تاجىكستان جانە قىرعىزستان دەلەگاتسيالارى ەكى ەلدىڭ شەكاراسىن دەليميتاتسيالاۋ جانە دەماركاتسيالاۋ بويىنشا بىرلەسكەن مالىمدەمە جاسادى
دۋشانبە. حوۆار- قازاقپارات - 1-مامىر كۇنى قىرعىز رەسپۋبليكاسىنىڭ باتكەن قالاسىندا قىرعىزستاننىڭ مەملەكەتتىك ۇلتتىق قاۋىپسىزدىك كوميتەتىنىڭ ءتوراعاسى ك. تاشيەۆ پەن تاجىكستاننىڭ مەملەكەتتىك ۇلتتىق قاۋىپسىزدىك كوميتەتىنىڭ ءتوراعاسى س. ياتيموۆتىڭ باسشىلىعىمەن ەكى ەلدىڭ شەكاراسىن دەليميتاتسيالاۋ جانە دەماركاتسيالاۋ بويىنشا ۇكىمەتتىك دەلەگاتسيالاردىڭ كەزەكتى وتىرىسى بولدى، دەپ حابارلايدى قازاقپارات حوۆار اگەنتتىگىنە سىلتەمە جاساپ.
شەكارالاس ايماقتاعى جاعدايدى تالقىلاۋ بارىسىندا قوس تاراپ تا بولعان جايعا وكىنىش ءبىلدىرىپ، قازا تاپقان ازاماتتاردىڭ تۋعان- تۋىستارىنا كوڭىل ايتتى. وسىنداي جاعدايدىڭ قايتالانۋىنا جول بەرمەۋ كەرەكتىگى ايتىلدى. ەكى تاراپ تا دەرەۋ اسكەري تەحنيكالاردى ولاردىڭ تۇراقتى ورنىنا قايتارۋعا ۋاعدالاستى.
حوۆار اگەنتتىگىنىڭ مالىمدەۋىنشە، كەزدەسۋ بارىسىندا تاجىك- قىرعىز مەملەكەتتىك شەكاراسىن دەليميتاتسيالاۋ جانە دەماركاتسيالاۋ بويىنشا پىكىر الماسۋ بولدى.
توپوگرافيالىق جۇمىس توپتارىنا جاقىن ارادا قالعان ۋچاسكەلەردەگى مەملەكەتتىك شەكارانى تۇسىرۋگە كىرىسۋ تاپسىرىلدى.
كابار اگەنتتىگىنىڭ مالىمەتىنشە، قوس تاراپ ەكى باۋىرلاس حالىقتىڭ كونە تاريحىنا كوز جۇگىرتە وتىرىپ، اراداعى قالعان شەكاراعا قاتىستى ماسەلەنى شەشۋدە ءبىر-بىرىنە تۇسىنۋشىلىك جانە سەنىم تانىتۋعا دايىن ەكەندىكتەرىن ايقىن ءبىلدىردى. ايتا كەتەيىك، 28-ءساۋىر كۇنى قىرعىزستان مەن تاجىكستان شەكاراسىندا ەكى ەل تۇرعىندارى ءوزارا كەلىسپەي، قاقتىعىس باستالدى. كەيىن قىرعىزستاننىڭ باتكەن وبلىسى باتكەن اۋدانىنىڭ «گولوۆنوي» ەلدى مەكەنىندە جاعداي شيەلەنىسە تۇسكەنى، ەل ازاماتتارى يسفارا- ۆورۋح تاسجولىن جاۋىپ تاستاعانى حابارلاندى. 29-ساۋىردە باتكەن وبلىسىنداعى قاقتىعىس ايماعىنان ەۆاكۋاتسيالانعان قىرعىزستاندىقتاردىڭ سانى 848 ادامدى قۇرادى. وسى كۇنى قىرعىزستان مەن تاجىكستان ساعات 20:00-دەن باستاپ اتىستى توقتاتۋ تۋرالى كەلىسىمگە كەلدى.
اۆتور: ەربول جانات
