بىشكەكتە ميتينگىگە شىققان توپ ۇكىمەتتەن قارۋ بەرۋىن تالاپ ەتتى
نۇر-سۇلتان. قازاقپارات - بىشكەكتە ۇكىمەت ءۇيىنىڭ الدىندا ميتينگىگە شىققان توپ باتكەن وبلىسىنىڭ شەكاراسىن قورعاۋ ءۇشىن قارۋ بەرۋدى تالاپ ەتتى، دەپ حابارلايدى قازاقپارات قىرعىزستاننىڭ قاۋىپسىزدىك كەڭەسىنە سىلتەمە جاساپ.
بۇل تۋرالى كابار اگەنتتىگى جازدى.
اتاپ وتىلگەندەي، بىشكەك قالاسىنداعى ۇكىمەت ءۇيىنىڭ الدىندا ميتينگىگە شىققاندار ولارعا باتكەن وبلىسىنداعى شەكارانى قورعاۋ ءۇشىن قارۋ بەرۋدى تالاپ ەتىپ وتىر.
«الايدا، قىرعىز رەسپۋبليكاسى قاۋىپسىزدىك كەڭەسىنىڭ حاتشىلىعى اتالعان تالاپتىڭ سالدارى اۋىر بولۋى مۇمكىن بولعاندىقتان، ونى ورىنداۋ مۇمكىن ەمەس ەكەنىن اتاپ ءوتتى»، - دەلىنگەن حابارلامادا.
سونىمەن بىرگە، ۇكىمەتتىك دەلەگاتسيالاردىڭ قىرعىز- تاجىك شەكاراسىنداعى جاعدايدى رەتتەۋ بويىنشا كەلىسسوزدەرى جالعاسىپ جاتىر. سونداي-اق، شەكارالىق قۇرىلىمداردىڭ ەكى باسشىسى تاجىكستان اۋماعىندا كەلىسسوزدەر جۇرگىزۋ ۇستىندە.
اۆتور: زارينا تۋعانبايەۆا
