الماتىلىق وقۋشى حالىقارالىق جاساندى ينتەللەكت وليمپياداسىنىڭ جەڭىمپازى اتاندى

الماتى. قازاقپارات - الماتى قالاسىنداعى حيميا- بيولوگيا باعىتىنداعى نازاربايەۆ زياتكەرلىك مەكتەبىنىڭ وقۋشىسى دانيال سۇلتانوۆ رەسەي فەدەراتسياسى ۇلتتىق تەحنولوگيالىق باستامالار (ۇ ت ب) ۇيىرمە قوزعالىسى حالىقارالىق وليمپياداسىنىڭ جەڭىمپازى اتاندى، دەپ حابارلايدى قازاقپارات.

«نازاربايەۆ زياتكەرلىك مەكتەپتەرى» دەربەس ءبىلىم بەرۋ ۇيىمى باسپا ءسوز قىزمەتىنىڭ مالىمەتىنشە، «جاساندى ينتەللەكت» ارنايى پروفيلىندە دانيال ۇزدىك شەتەلدىك جوبا ءۇشىن «حالىقتار دوستىعى» نوميناتسياسىندا ءبىرىنشى ورىن الدى.

وليمپيادانى ۇيىمداستىرۋشىلاردىڭ قاتارىندا - ۇيىرمە قوزعالىسى جانە ۇ ت ب «پلاتفورماسى»، رەسەيدىڭ عىلىم جانە جوعارى ءبىلىم، وقۋ- اعارتۋ مينيسترلىكتەرىمەن بىرلەسكەن ستراتەگيالىق باستامالار اگەنتتىگى جانە رەسەيلىك ۆەنچۋرلىق كومپانيا بار. جابىلۋ سالتاناتى مەن جەڭىمپازداردى ماراپاتتاۋ ماسكەۋدە ءوتتى، جاساندى ينتەللەكت سالاسىنداعى ۇزدىك وقۋشىلاردى سبەربانك پرەزيدەنتى گەرمان گرەف قۇتتىقتادى.

«بەس جىل بۇرىن AI تاقىرىبىندا سويلەگەن كەزدە ءشول دالاداعى جاڭعىرىق سەكىلدى ەستىلەتىن، ال بۇگىن AI - بۇل «ەلەكتر»، ول قايتا ورلەۋ، جاندانۋ كەزەڭىندە. ءبىراق عىلىم، زەرتتەۋ جانە پراكتيكالىق تۇرعىدان قولدانۋ بىردەي شامادا كەلە جاتىر. قىمباتتى بالالار، سىزدەر دۇرىس باعىتتا جانە دۇرىس جولدا كەلەسىزدەر، دۇرىس ۋاقىتتا جانە دۇرىس جەردە ءومىر سۇرۋدەسىزدەر. الىنعان تاجىريبە پايدالى بولارىنا سەنىمدىمىن»، - دەدى گەرمان گرەف.

الەمدەگى ەڭ بەدەلدى وليمپيادالاردىڭ بىرىندە بەس مىڭنان استام وقۋشى كەزدەستى، بايقاۋلار جاساندى ينتەللەكت پەن سۋ استى روبوت تەحنيكاسىنان باستاپ گەنومدى وڭدەۋ مەن VR تەحنولوگياسىنا دەيىن 28 تەحنولوگيالىق بەيىندە وتكىزىلدى.

«اقپاراتتىق قاۋىپسىزدىك»، «جاساندى ينتەللەكت»، «بيزنەس پروتسەستەردى اۆتوماتتاندىرۋ» ەڭ تانىمال IT پروفيلدەر قاتارىندا بولدى. بيىل وليمپيادا جاڭا رەكورد ورناتتى - بارلىق ترەكتەر بويىنشا رەسەيدىڭ 85 ءوڭىرى مەن شەتەلدەردەن 110000-نان استام بالا قاتىسۋعا ءوتىنىم بەردى.

«فينالدا قاتىسۋشىلار تەك تەحنولوگيالىق تاپسىرمالاردى عانا شەشىپ قويعان جوق - وقۋشىلار الدىندا جاساندى ينتەللەكت، روبوت تەحنيكاسى، عارىش يندۋسترياسى سالاسىنداعى جەتەكشى كومپانيالاردا جۇمىس ىستەيتىن ماماندار اينالىساتىن جاڭا سىن- قاتەرلەر تۇردى. جوعارى سىنىپ وقۋشىلارى ەرەسەك ارىپتەستەرىنىڭ ويلارىنان اسىپ تۇسەتىن قىزىقتى شەشىمدەردى ۇسىنا ءبىلدى»، - دەيدى ۇ ت ب «جاس ماماندار» باعىتى ديرەكتورىنىڭ ورىنباسارى يۋليا حانجينا.

2021 -جىلى فيناليستەر ەڭ كوپ سۇرانىسقا يە تەحنولوگيالارعا قاتىستى ماسەلەلەردى شەشتى: جاساندى ينتەللەكت، ماشينالىق وقىتۋ، كومپيۋتەرلىك كورۋ، ۆيرتۋالدى جانە كەڭەيتىلگەن شىندىق، گەنومدىق وڭدەۋ. بولىنگەن فورماتتاعى ينجەنەرلىك تاپسىرمامەن جۇمىس ىستەۋ ءۇشىن 2020 -جىلى فينالدا سىنالعان ءبىرقاتار تەحنولوگيا قولدانىلدى: مامانداندىرىلعان باعدارلامالىق جاساقتاما، سيمۋلياتور، كوماندالىق جۇمىس ءۇشىن جەكە بەينە جانە داۋىس ارناسى، سىناق الاڭدارىنان ترانسلياتسيا. قورىتىندى سايىسقا جۇزدەن استام وقۋشى قاتىستى، ولاردىڭ الدىندا اقىل- ويدى ەسكەرەتىن الگوريتم قۇرۋ مىندەتى تۇردى. سوڭعى سىناق ءۇشىن قاتىسۋشىلارعا كريستوفاريدىڭ سۋپەركومپيۋتەرى ۇسىنىلدى.

«جاساندى ينتەللەكت جاي عانا ءبىزدىڭ بولاشاعىمىز ەمەس، ول بۇگىننىڭ وزىندە ەنگىزىلىپ جاتىر. سوندىقتان ءبىز ترەندتە بولۋعا جانە وقۋعا، ىزدەۋگە، سىناپ كورۋگە ءتيىسپىز، وليمپيادا بۇل تۇرعىدا مەن ءۇشىن جاقسى مەكتەپكە اينالدى»، - دەدى دانيال ماراپاتتاۋ راسىمىنەن كەيىن.