كوروناۆيرۋسقا قارسى سۋبۋنيتتىك ۆاكسينا مەملەكەتتىك ساراپتامادان ءوتتى

ينستيتۋتتىڭ باس ديرەكتورى كۇنسۇلۋ زاكاريا QazVac-تان وزگە ءتورت ۆاكسينانىڭ قازىر قانداي ساتىعا شىققانىن ايتتى، دەپ حابارلايدى قازاقپارات ءتىلشىسى.

«عالىمدار ءبىر ۋاقىتتا بەس ءتۇرلى پلاتفورمادا بەس ءتۇرلى ۆاكسينا ازىرلەپ جاتىر. QazCOVID-in نەمەسە QazVac تۋرالى ءبارىن بىلەسىزدەر دەپ ويلايمىن. ەكىنشىسى - سۋبۋنيتتىك ۆاكسينا. بۇگىنگى تاڭدا ول بيولوگيالىق قاۋىپسىزدىك ماسەلەلەرى ينستيتۋتىنىڭ بازاسىندا جانۋارلارعا ەگىلىپ، كلينيكاعا دەيىنگى كەزەڭنەن تولىق ءوتتى. دارىلىك زاتتاردى ساراپتاۋ ۇلتتىق ورتالىعىندا مەملەكەتتىك ساراپتامادان دا ءساتتى ءوتتى. ولار دا وڭ قورىتىندىسىن بەردى. ەندى اتالعان سۋببىرلىكتى ۆاكسينا كلينيكالىق زەرتتەۋدىڭ ءبىرىنشى كەزەڭىنە شىعادى»، - دەدى كۇنسۇلۋ زاكاريا.

ينستيتۋتتىڭ باس ديرەكتورى وزگە ۆاكسينالار تۋرالى دا ايتتى.

«بىزدە ءبىر مەزگىلدە ەكى ۆەكتورلىق ۆاكسينا ازىرلەنۋدە. بىرەۋى تۇماۋ ۆەكتورى نەگىزىندە، ەكىنشىسى ۆيرۋستىڭ كاپريپوكس ۆەكتورىندا جاسالدى. ءقازىر بۇل ەكى ۆاكتسينا جانۋارلارعا ەگىلىپ، كلينيكاعا دەيىنگى سىناقتاردان ءوتىپ جاتىر. ۆاكتسينانىڭ بەسىنشى ءتۇرى - «ءتىرى» ۆاكسينا. ءبىز الەمدە ءبىرىنشى بولىپ السىرەتىلگەن ۆاكسينانى الۋعا تىرىسامىز. جۇزدەن استام سىنامانىڭ ىشىنەن ىرىكتەپ الدىق. جۋىق ارادا ونى دا جانۋارلارعا ەگىپ، كلينيكاعا دەيىنگى زەرتتەۋگە شىعارامىز»، - دەدى كۇنسۇلۋ زاكاريا.

عالىمنىڭ ايتۋىنشا، ازىرلەنىپ جاتقان ءتورت ۆاكسينانى ساقتاۋ تەحنولوگياسى QazCOVID-in (QazVac) ۆاكسيناسىنان وزگەشە بولادى.

ەسكە سالساق، QazVac 2 دەن 8 گرادۋسقا دەيىنگى تەمپەراتۋرادا ساقتالۋى كەرەك.