تۇركىستان وبلىسىندا كولىك ءنومىرىنىڭ ورنىنا ەسىمىن جازىپ العان جۇرگىزۋشى جاۋاپقا تارتىلدى

قۇقىقبۇزۋشىلىققا جول بەرگەن تۇرعىن الەۋمەتتىك جەلىلەرگە مونيتورينگ جۇرگىزۋ كەزىندە انىقتالعان، دەپ حابارلايدى قازاقپارات ءتىلشىسى.

وسىنداي كەزەكتى تەكسەرۋ كەزىندە سايرام اۋدانىنىڭ پوليتسەيلەرى قالا كوشەلەرىنىڭ بىرىندە ارتقى مەملەكەتتىك ءنومىرى تۇراتىن ورىنعا ءوزىنىڭ ەسىمىن قويىپ العان «مەرسەدەس- بەنس» ماركالى اۆتوكولىكتىڭ بەينەجازباسىن بايقاپ قالادى. كولىك تىزگىندەۋشى بەينەكورىنىستە جول بويىندا باسىپ وزۋ ماقساتىندا قارسى باعىتقا شىققان. اۋداندىق پوليتسيا قىزمەتكەرلەرى اۆتوكولىكتىڭ يەسى اقسۋكەنت اۋىلىنىڭ تۇرعىنى ەكەنىن انىقتادى.

«جاس جىگىت جول ءجۇرىسى ەرەجەلەرىن بۇزعانى ءۇشىن ق ر ا ق ب ت ك-نىڭ ءۇش بىردەي بابىمەن جاۋاپقا تارتىلدى. ولار، 590-بابى 4-بولىگىمەن «كولىك قۇرالدارىن پايدالانۋ قاعيدالارىن بۇزۋ»، 593-بابى 2-بولىگىمەن «جول ءجۇرىسى قاعيدالارىندا كوزدەلگەن جولاۋشىلاردى جانە جۇكتەردى تاسىمالداۋ، قاۋىپسىزدىك بەلدىكتەرىن نەمەسە موتوشلەمدەردى پايدالانۋ جونىندەگى تالاپتاردى ساقتاماۋ»، 596-بابى 2-بولىگىمەن «كولىك قۇرالىن جولدىڭ ءجۇرۋ بولىگىندە ورنالاستىرۋ، قارسى ءجۇرىپ ءوتۋ نەمەسە باسىپ وزۋ قاعيدالارىن بۇزۋ». قازىرگى تاڭدا جول ءجۇرىسى قاعيدالارىن ورەسكەل بۇزعان جۇرگىزۋشىگە قاتىستى اكىمشىلىك ءىس اۋداندىق سوتقا جولداندى»، - دەلىنگەن حابارلامادا.