قاتەرلى ىسىكتىڭ ەرتە دياگنوستيكاسى ۇزاق ءومىر سۇرۋگە مۇمكىندىك بەرەدى - ونكولوگ

نۇرلان بالتابەكوۆ قازاقستاندا وكپەنىڭ قاتەرلى ىسىگى سوڭعى 25 جىل ىشىندە قاتەرلى ىسىك ءولىمىنىڭ قۇرىلىمىندا ءبىرىنشى ورىندا تۇرعانىن اتاپ ءوتتى. ەلدەگى ءاربىر بەسىنشى ونكولوگيالىق ناۋقاس وكپەنىڭ قاتەرلى ىسىگىنەن قايتىس بولادى.

«قاتەرلى ىسىكتىڭ اسقىنعان ءتۇرى مەن ەرتە انىقتالعان ءتۇرىن ەمدەۋ - بۇل ەكى ءتۇرلى باعىت. سونىمەن، وكپەنىڭ قاتەرلى ىسىگىنىڭ ءبىرىنشى كەزەڭى ۋاقتىلى حيرۋرگيالىق ەمدەۋمەن، اسىرەسە ليمفا تۇيىندەرىن توراكوسكوپيالىق جولمەن الىپ تاستاۋ پاتسيەنتتەردىڭ % 90 - دان استامىن بەس جىلدان استام ءومىر سۇرۋگە مۇمكىندىك بەرەدى»، - نۇرلان بالتابەكوۆ ايتتى.

ول وكپەنىڭ قاتەرلى ىسىگىنىڭ كەيبىر تۇرلەرىن، مىسالى، ادەنوكارتسينومامەن اۋىراتىن ناۋقاستاردى ونكولوگتاردىڭ كومەگىمەن جانە جاڭا تەحنولوگيالاردى ەنگىزە وتىرىپ امان الىپ قالۋعا بولادى.

«بۇرىن بىزدە ءتورتىنشى ساتىداعى وكپەنىڭ قاتەرلى ىسىگى بار ناۋقاستار بەس جىل ءومىر سۇرە الامايتىن. ماقساتتى ەمدەۋدىڭ جاڭا تەحنولوگيالارىن ەنگىزۋ كەيبىر پاتسيەنتتەرگە، شامامەن 1/4 ءتورتىنشى كەزەڭدە دە ۇزاق ءومىر سۇرۋگە مۇمكىندىك بەردى. ءبىراق وسىنداي ءبىر ناۋقاستى ەمدەۋ ءۇشىن جىلىنا 40 ميلليون تەڭگە جۇمسالادى. سوندىقتان وكپەنىڭ قاتەرلى ىسىگىن ەرتە دياگنوستيكا ارقىلى انىقتاۋ قاجەت. تەك سول كەزدە عانا مەتاستازداردىڭ پايدا بولۋىنا جول بەرىلمەيدى، - دەدى ول.

قاتەرلى ىسىكتى باقىلاۋ جونىندەگى حالىقارالىق اگەنتتىكتىڭ وكىلى دوكتور اندرەا كارۆالو تومەن دوزالى كومپيۋتەرلىك توموگرافيا كومەگىمەن وكپە قاتەرلى ىسىگىنە سكرينينگ وتكىزۋدىڭ تيىمدىلىگى تۋرالى ايتتى.

«قازىرگى تاڭدا وكپە راگىنان بولاتىن ءولىمدى ازايتۋدىڭ بىردەن- ءبىر جولى ونى ەرتە كەزەڭدە انىقتاۋ بولىپ وتىر. سكرينينگ جۇرگىزىلگەندە قاتىسۋشىلاردىڭ % 50-70- دە ىسىكتىڭ 1 ساتىسى انىقتالادى. سوندىقتان وسىنداي سكرينينگتى تەكسەرىستەردى كەشەندى تۇردە وتكىزۋ قاجەت. ول ءۇشىن تومەن دوزالى كومپيۋتەرلىك توموگرافيا قولدانىلادى. ماسەلەن، 2020 -جىلى وسىنداي سكرينينگتىڭ ارقاسىندا وكپە راگىنىڭ 1 ساتىسىندا - % 58,6، Ⅱ ساتىسىندا - % 9,3، Ⅲ ساتىسىندا - % 9,9، 4 -ساتىسىندا - % 9,4- ى انىقتالعان. كورىپ وتىرعاندارىڭىزداي راكتىڭ 70 پايىزدايى 1 جانە Ⅱ ساتىسىندا انىقتالعان، بۇل ەمدەۋگە جاتاتىن كەزەڭ»، - دەيدى ساراپشى.

ايتا كەتەيىك، الماتىدا «قازاق ونكولوگيا جانە راديولوگيا عىلىمي- زەرتتەۋ ينستيتۋتى» ا ق، «قازاقستاندىق ونكولوگتار قاۋىمداستىعى» ق ب- نىڭ ۇيىمداستىرۋىمەن ءوتىپ جاتقان كونفەرەنسياعا يتاليا، تۇركيا، يسپانيا، رەسەي، بەلورۋسسيا جانە قازاقستاننىڭ ونكولوگيالىق ورتالىقتاردىڭ ساراپشىلارى قاتىسىپ جاتىر.

اۆتور: الما مۇقانوۆا