ساپارحان وماروۆ شەتەلدىكتەرگە جالعا بەرىلگەن جەر القابى تۋرالى ايتتى
جيىن بارىسىندا اۋىل شارۋاشىلىعى ءمينيسترى ساپارحان وماروۆ قازىرگى كەزدە شەتەلدىكتەرگە جالعا بەرىلگەن القاپ تۋرالى ايتتى، دەپ حابارلايدى قازاقپارات ءتىلشىسى.
«قازىرگى ۋاقىتتا جالپى اۋدانى 74,4 مىڭ گەكتار اۋىل شارۋاشىلىعى ماقساتىنداعى جەردى شەتەلدىك قاتىسۋى بار جەتى زاڭدى تۇلعا جالعا الىپ وتىر. ونىڭ ىشىندە جامبىل وبلىسىندا اۋىل شارۋاشىلىعىنا ارنالعان اۋدانى 5,9 مىڭ گەكتاردى 1 كاسىپورىن، پاۆلودار وبلىسىندا اۋدانى 32,2 مىڭ گەكتار اۋىل شارۋاشىلىعىنا پايدالانىلاتىن جەرى بار 1 كاسىپورىن، اتىراۋ وبلىسىندا 1,6 مىڭ گەكتار جەر 1 كاسىپورىندا جانە اقمولا وبلىسىندا جالپى الاڭى 34,7 مىڭ گەكتاردى قۇرايتىن اۋىل شارۋاشىلىعى ماقساتىنداعى 4 كاسىپورىن بار»، - دەدى س. وماروۆ.
سونىمەن قاتار مينيستر ەكى شەتەلدىك كومپانيا جۇمىس ىستەيتىنىن، بۇل شىعىس قازاقستان وبلىسىندا 14,9 مىڭ گەكتار القاپتا 1 كاسىپورىن جانە جامبىل وبلىسىندا 3,6 مىڭ گەكتار القاپتا 1 كاسىپورىن بار ەكەنىن ايتتى. وسى ورايدا ول بۇل جەرلەردىڭ بارلىعى مەملەكەتكە قايتارىلاتىنىن ناقتىلادى.
«وسى كومپانيالار بۇل جەرلەردى موراتوري ەنگىزىلگەنگە دەيىن جالعا العان. بۇل رەتتە وسى شەتەلدىك كومپانيالاردىڭ اۋىل شارۋاشىلىعى جەرلەرىنىڭ جالداۋ مەرزىمدەرى 2022 -جىلدان باستاپ 2025 -جىلعا دەيىنگى كەزەڭدە اياقتالادى. تيىسىنشە، جالعا الۋ مەرزىمى اياقتالعاننان كەيىن جاڭا مەرزىمگە ۇزارتىلمايدى، ويتكەنى بۇگىنگى كۇنى تالقىلانعان زاڭ جوباسى شەتەلدىك جەر پايدالانۋشىلارعا جانە ءارتۇرلى بىرلەسكەن كاسىپورىندارعا جەر بەرۋگە تولىق تىيىم سالۋدى قاراستىرادى»، - دەدى ساپارحان وماروۆ.
