تۇركىستاندا تاريحي ەسكەرتكىشتەردى قورعاۋعا ارنالعان فوتوكورمە ءوتتى

شارانىڭ وتۋىنە وبلىستىق تاريحي- مادەني مۇرانى قورعاۋ، قالپىنا كەلتىرۋ جانە پايدالانۋ ورتالىعى ۇيىتقى بولدى، دەپ حابارلايدى قازاقپارات ءتىلشىسى.

اتالعان شارا تاريحي- مادەني نىسانداردى ناسيحاتتاي وتىرىپ، ەسكەرتكىشتەردى قورعاۋ جايىندا تۇرعىندارعا اقپاراتتاندىرۋ- اعارتۋ جۇمىستارىن جۇرگىزۋگە وراي ۇيىمداستىرىلدى. ارحەولوگيالىق ەسكەرتكىشتەرمەن قوسا كيەلى ورىنداردىڭ فوتوسۋرەتتەرى قويىلعان كورمە قالا اكىمدىگىنىڭ عيماراتى الدىنا جانە تسيتادەل قاقپاسىنا باراتىن اياقجول الاڭقايىنا قويىلدى. كورمەنى تاماشالاعان قالا تۇرعىندارى مەن قوناقتارى سۋرەتتەردى قىزىقتاي ءجۇرىپ، ەسكەرتكىشتەردى قورعاۋ سالاسىندا اتقارىلىپ جاتقان شارۋالارمەن تانىستى.

ايتا كەتەيىك، تۇركىستان وبلىسىندا 1 نىسان يۋنەسكو شەڭبەرىندەگى حالىقارالىق ماڭىزى بار ەسكەرتكىشتەر ساناتىنا جاتادى. ال، 31 نىسان رەسپۋبليكالىق ماڭىزى بار، 423 نىسان جەرگىلىكتى ماڭىزى بار ەسكەرتكىش سانالادى. تاريحي- مادەني ەسكەرتكىشتەردى ءبۇلدىرۋ، قاساقانا جويۋ ارەكەتىنە ق ر اكىمشىلىك قۇقىق بۇزۋشىلىق تۋرالى كودەكسىنىڭ تالاپتارىنا سايكەس 10 ا ە ك- تەن باستاپ، 250 ا ە ك- كە دەيىن ايىپپۇل سالىنادى. سونىمەن قاتار، ق ر قىلمىستىق كودەكسىنىڭ تالاپتارىنا ساي 3 جىلدان 7 جىلعا دەيىن باس بوستاندىعىنان ايىرۋ جازاسى قاراستىرىلعان.