تۇركىستاندى اباتتاندىرۋعا اقساقالدار اتسالىستى
اتالمىش شاراعا قوعامدىق دامۋ باسقارماسىنىڭ باسشىسى دامير ءجۇنىسوۆ، وبلىستىق اقساقالدار القاسىنىڭ ءتوراعاسى جارىلقاسىن ازىرەتبەرگەنوۆ جانە جاۋاپتى سالالىق باسقارما باسشىلارى مەن اۋدان، قالالاردىڭ تۇركىستان قالاسىن اباتتاندىرۋعا جانە بەلگىلەنگەن سەكتورلارعا جاۋاپتى ماماندارى قاتىستى. جيىندا العاش بولىپ ءسوز العان قوعامدىق دامۋ باسقارماسىنىڭ باسشىسى دامير ءجۇنىسوۆ وبلىس اكىمى ءو. شوكەيەۆتىڭ تۇركىستان قالاسىن كوگالداندىرۋ بويىنشا تاپسىرماسىنا سايكەس ءتيىستى جۇمىس ءوز دارەجەسىندە اتقارىلىپ جاتقاندىعىن ايتتى.
«ءبىز وبلىستىق اقساقالدار القاسىمەن بىرلەسە وتىرىپ تۇركىستان قالاسىنداعى 9 مولتەك اۋدانداعى 850 كوشە بويىنا ەگىلگەن كوشەتتەردىڭ ءوسۋى ءۇشىن، ولاردى كۇتىپ- باپتاۋ جۇمىسىنا وبلىس اقساقالدار القاسى مەن جەرگىلىكتى تۇرعىنداردى تارتۋ ماسەلەسىن قولعا الىپ وتىرمىز. قازىرگى تاڭدا تۇركىستان قالاسى 32 سەكتورعا بولىنگەن. ءار اۋماققا اۋدان، قالا اكىمدىكتەرى مەن باسقارما باسشىلارى جاۋاپتى رەتىندە بەلگىلەنگەن. شاھارداعى «جاسىل بەلدەۋ» ايماعىنداعى كوشەتتەردىڭ سۋارىلۋى باستى نازارداعى ماسەلە بولىپ وتىر. وسى ماقساتتا سەكتور اۋماعىندا ۇڭعىمالار قازىلىپ، جەراستى سۋى پايدالانۋدا. ءار سەكتوردا 10 مىڭعا جۋىق كوشەت وتىرعىزىلىپ، ءار تالدىڭ تۇبىنە سۋ جەتكىزىلۋدە. كەي سەكتوردا تامشىلاتىپ سۋارۋ جۇيەسى جۇرگىزىلسە، كەي سەكتورلار قاجەتتى سۋدى ارىس- تۇركىستان كانالىنان تارتۋدا. سونىمەن قاتار، كوشەلەردە جارىقشامدار، قوقىس جاشىكتەرى مەن تۇرعىنداردىڭ دەمالۋىنا ارنالعان ورىندىقتار ورناتىلدى. اپتا سايىن 32 سەكتور اۋماعىندا اۋدان، اۋىلداردان كەلگەن ازاماتتاردىڭ قاتىسۋىمەن سەنبىلىك ۇيىمداستىرىلۋدا. دەگەنمەن، وسىنشا قىرۋار جۇمىستاردىڭ جەمىستى بولىپ، تۇركىستان قالاسى تولىقتاي جاسىل ايماققا اينالۋى ءۇشىن ءاربىرىمىزدىڭ ۇلەس قوسۋىمىز اسا ماڭىزدى. اقساقالدار القاسىنىڭ بۇل باستاماسى تۇركىستاندىقتاردىڭ تاراپىنان قولداۋعا يە بولادى دەپ سەنەمىن»، - دەدى دامير ءجۇنىسوۆ.
وڭىردەگى اقساقالدار القاسىنىڭ ءتوراعاسى جارىلقاسىن ازىرەتبەرگەنوۆ تۇركىستان قالاسىن اباتتاندىرۋ بويىنشا اتقارىلعان جۇمىس بارىسىن جەتكىزدى. ونىڭ سوزىنشە، قازىرگى تاڭدا جاڭارۋ مەن جاندانۋدىڭ داڭعىل جولىنا تۇسكەن، تۇركى ەلدەرىنىڭ رۋحاني استاناسى تۇركىستان قالاسىن جاسىل جەلەككە اينالدىرۋ قارقىندى جۇزەگە اسۋدا. اسىرەسە قالا اۋماعىنا ءوڭىردىڭ كليماتىنا قولايلى ءتۇرلى اعاش ەگىپ، جەرگىلىكتى تۇرعىندارعا قولايلى ءومىر قالىپتاستىرۋ جۇمىسى جاقسى جولعا قويىلعان. وبلىس ورتالىعىن سەكتورلارعا ءبولىپ، وعان اۋدان، قالالار مەن سالالىق باسقارمالاردى جاۋاپتى ەتىپ قويۋ - بۇل باعىتتاعى جۇمىستاردىڭ جەمىستى بولارىنا سەنىمدى ۇلعايتادى. الايدا، تۇركىستان قالاسىنا ەگىلگەن ءار اعاشتىڭ ءوسىپ، وزدىگىنەن جايقالىپ كەتەتىن دارەجەگە جەتكەنشە ونى كۇتىپ، باپتاۋ، ۋاقىتىلى ءتۇبىن قوپسىتىپ، سۋارۋ - جاۋاپتى جانداردان بولەك ءاربىر تۇرعىنعا جۇكتەلگەن ۇلكەن مىندەت بولىپ تۇر.
«تۇركىستان قالاسىنا قازاقستاننىڭ ءاربىر ءوڭىرى، ءتىپتى تۇركى ەلدەرى قامقورلىقپەن قاراپ، ءوسىپ- وركەندەۋىنە ۇلەسىن قوسىپ جاتقان تۇستا - ءبىزدىڭ جۇمىلا ارەكەت ەتىپ، قالانى جاسىل جەلەككە اينالدىرۋدى باستى ماقسات ەتىپ العانىمىز ءجون دەپ ەسەپتەيمىن. وسىعان بايلانىستى بارلىق جاۋاپتى سالا ماماندارىن، اقساقالداردى، جاستار قاۋىمىن، جالپى قالا تۇرعىندارىن ەگىلگەن ءار اعاشقا قامقورلىقپەن قاراپ، بىرىگىپ ارەكەت ەتۋگە شاقىرامىن! بۇل- وسكەلەڭ ۇرپاق الدىنداعى مىندەتىمىز ءارى ءاربىرىمىزدىڭ كۇندەلىكتى ءومىر سالتىمىزدى جاقسارتۋدىڭ تاپتىرماس جولى دەپ بىلەمىن»، - دەدى جارىلقاسىن ازىرەتبەرگەنوۆ.
