جەتىسايلىق تۇرعىن اۋلا سىپىرۋشى جالعىزباستى اناعا باسپانا سىيلادى

ەكى قىز ءوسىرىپ وتىرعان نازگۇل شادمانوۆا باسپاناعا قول جەتكىزە الماي كەلە جاتقانىنا بىرنەشە جىل بولعان، دەپ حابارلايدى قازاقپارات ءتىلشىسى.

تاعدىردىڭ تاۋقىمەتىن تارتقان انا جومارتتىق تانىتقان ازاماتقا شەكسىز العىسىن ءبىلدىردى. ول جەتىساي قالاسىنداعى ورتالىق بازاردا اۋلا سىپىرىپ، قىزدارىن اسىراپ ءجۇر. تاپقانى پاتەراقى مەن ازىق- تۇلىكتەن ارتىلمايدى. كەلىنشەك كۇندىز- ءتۇنى ۋايىمعا سالىنىپ كەلگەنىن جاسىرمايدى. ەندى كۇتپەگەن جەردەن باسپانالى بولىپ، قۋانىشقا كەنەلدى.

«جاڭا ۇيگە قاجەتتى جيھازدارى مەن ازىق- تۇلىگىنە دەيىن بەرىپ وتىر. ەندى بار تاپقانىمدى قىزدارىمدى تارىقتىرماي وسىرۋگە جۇمسايمىن. يگى ءىس جاساپ وتىرعان ازاماتتارعا العىستان باسقا ايتارىم جوق»، - دەيدى ن. شادمانوۆا.

ال، قايىرىمدى ءىستىڭ باستاماشىسى بولعان - «ءنار- تامشى» قوعامدىق قايىرىمدىلىق قورىنىڭ ءتوراعاسى ەرماحان راحماتۋللا. ول بۇعان دەيىن ءوز قاراجاتى ەسەبىنەن 10-عا جۋىق وتباسىعا باسپانا تارتۋ ەتكەن بولاتىن.

ايتا كەتەيىك، بۇگىندە جەتىساي اۋدانىندا 80 گەكتار جەرگە 200 پاتەرلى 6 كوپقاباتتى ءۇي سالىنۋدا. جىل سوڭىنا دەيىن ءبىرقاتار ءۇيدىڭ قۇرىلىسى اياقتالىپ، ونداعى پاتەرلەر باسپانا كەزەگىندە تۇرعان از قامتىلعان وتباسىلارعا ۇلەستىرىلەدى دەپ جوسپارلانىپ وتىر.

اۆتور: اينۇر اقبايەۆا