اقتوبەلىك مۇنايشىلار قىتايلىق ۆاكسينا سالدىرادى

اقتوبە وبلىسى بويىنشا 38 مىڭنان استام ادام ۆاكسينا سالدىرعان. ونىڭ 6 مىڭنان استامى ەكى كومپونەتتى دە الدى. وتكەن دەمالىس كۇندەرى تاعى 14800 دوزا سپۋتنيك V ۆاكسيناسى وڭىرگە جەتكىزىلدى. سونىمەن بىرگە QazVac ەكپەسىنىڭ 2 مىڭ دوزاسى اكەلىندى.

«قازاقستاندىق QazVac ۆاكسيناسى ەمحانالارعا تاراتىلدى. وسى اپتادا وتاندىق ۆاكسينا بەرىلە باستايدى. سونىمەن بىرگە قىتايلىق «سينوفارم» ۆاكسيناسى قازىر ساۋد ارابياسىندا ءوندىرىلىپ جاتىر. وندا ۆاكسيناعا «Hayat-Vax» اتاۋى بەرىلگەن. ءدال وسى قىتايلىق ۆاكسينانىڭ 22 مىڭ دوزاسى 30 -ءساۋىر كۇنى وبلىسقا جەتكىزىلەدى. جوسپار بويىنشا «سامۇرىق قازىنا» كومپانياسىنىڭ جۇمىسشىلارىنا، ياعني، وڭىردەگى ءىرى مۇناي كومپانيالارىنىڭ قىزمەتكەرلەرىنە ەگىلەدى. كەيىن تۇرعىندارعا دا جەتكىزىلەدى»، - دەدى وبلىستىق دەنساۋلىق ساقتاۋ باسقارماسىنىڭ باسشىسى رۇستەم يسايەۆ.

ايتا كەتەيىك، اقتوبە وبلىسى 31 -ناۋرىزدان بەرى «قىزىل» ايماقتا. وتكەن تاۋلىكتە تاعى 125 ادامنان كوروناۆيرۋس ينفەكسياسى انىقتالدى. قازىر 750 ناۋقاس ينفەكسيالىق اۋرۋحانالاردا ەم الىپ جاتىر. ونىڭ 50- ءى جانساقتاۋ بولىمىندە. بارلىعى 7 ادام وكپەنى جاساندى جەلدەتۋ اپپاراتىنا قوسىلعان.

اۆتور: التىناي ساعىندىقوۆا