دەنساۋلىق ساقتاۋ ءبىرىنشى ۆيتسە-ءمينيسترى قازاقستاندىق ۆاكسيناسىمەن ەگىلدى
بۇل تۋرالى قازاقپارات اتالمىش ۆەدوموستۆونىڭ باسپا ءسوز قىزمەتىنە سىلتەمە جاساپ حابارلايدى. حاتتاماعا سايكەس، م. شورانوۆ مەديتسينالىق تەكسەرۋدەن ءوتىپ، دارىگەردىڭ قورىتىندىسىنان كەيىن ەگۋ كابينەتىنە باردى. رەسەيلىك سپۋتنيك V ۆاكسيناسىنان ايىرماشىلىعى، ءبىر QAZVAC قۇتىسى ءبىر ادامعا ارنالعان. ۆاكسيناتسيادان كەيىن ءبىرىنشى دەنساۋلىق ساقتاۋ ۆيتسە-ءمينيسترى مەديتسينالىق باقىلاۋدا 30 مينۋت وتكىزدى.
«بۇگىننەن باستاپ قازاقستاندىق ۆاكسينا ءبىزدىڭ ازاماتتار ءۇشىن قولجەتىمدى. 50 مىڭ دوزادان تۇراتىن ءبىرىنشى پارتياسى وڭىرلەرگە جونەلتىلدى. وزدەرىڭىز بىلەتىندەي، بۇرىن مەنىڭ ارىپتەستەرىم اجار گينيات پەن ەرلان قياسوۆ سپۋتنيك V ۆاكسيناسىمەن ءبىرىنشى بولىپ ەگىلدى، بۇگىن ءبىز دەنساۋلىق ساقتاۋ ءمينيسترى الەكسەي ۆلاديميروۆيچپەن بىرگە ازاماتتارعا پرەپاراتتىڭ ءقاۋىپسىز ەكەنىن كورسەتۋ ءۇشىن وتاندىق ءوندىرىستىڭ ۆاكسيناسىن الدىق»، - دەپ اتاپ ءوتتى م. شورانوۆ.
ءبىرىنشى ۆيتسە-مينيستر سونىمەن قاتار جاناما اسەرلەردى سەزىنبەيتىنىنە، ءوزىن جاقسى سەزىنەتىنىنە سەندىردى. ەستەرىڭىزگە سالا كەتەيىك، مەملەكەت باسشىسىنىڭ 2021 -جىلعى 26-قاڭتارداعى تاپسىرماسىن ورىنداۋ ءۇشىن حالىقتى جاپپاي ۆاكسيناتسيالاۋدى قامتاماسىز ەتۋ ءۇشىن بيولوگيالىق قاۋىپسىزدىك پروبلەمالارى عىلىمي-زەرتتەۋ ينستيتۋتى بازاسىندا قازاقستاندىق COVID-19 ۆاكسيناسىنىڭ العاشقى پارتياسى QazCovid-in (QAZVAC) شىعارىلدى.
«س ق-فارماتسيا» ءبىرىڭعاي ديستريبيۋتورىنىڭ حابتارىنا 50 مىڭ دوزا كولەمىندە وتاندىق ۆاكسينانىڭ ءبىرىنشى پارتياسىن جەتكىزۋ 23 ساۋىردە جۇزەگە اسىرىلدى. ونىڭ ىشىندە 6000 دوزانى نۇر-سۇلتان مەن الماتى، 4000 دوزادان - شىمكەنت، قاراعاندى، شىعىس قازاقستان جانە الماتى وبلىستارى الادى، قالعان وڭىرلەرگە ەكى مىڭ دوزادان تۇسەدى. ءمينيستردىڭ ۆاكسيناتسيالاۋ ءراسىمى تىكەلەي ەفيردە ۆەدومستۆونىڭ Facebook-تەگى رەسمي پاراقشاسىندا ءوتتى.
