ەلجان ءبىرتانوۆتى جۇمىسقا الاسىز با: تىلشىلەر دەنساۋلىق مينيسترىنە سۇراق قويدى
نۇر- سۇلتان. قازاقپارات - بۇگىن تىكەلەي ەفيردە QazCOVID-in ۆاكسيناسىن العان ق ر دەنساۋلىق ساقتاۋ ءمينيسترى الەكسەي سويعا «بۇرىنعى دەنساۋلىق ساقتاۋ ءمينيسترى ەلجان ءبىرتانوۆتى جۇمىسقا الاسىز با؟» دەگەن ساۋال قويىلدى، دەپ حابارلايدى قازاقپارات ءتىلشىسى.
«سوت ەلجان ءبىرتانوۆقا ۇيدەن شىعۋعا جانە جۇمىس ىستەۋگە رۇقسات بەردى. ونى دەنساۋلىق ساقتاۋ مينيسترلىگىنە قابىلدايسىز با؟»، - دەپ سۇرادى تىكەلەي ەفير بارىسىندا «حابار 24» تەلەارناسىنىڭ ءتىلشىسى.
بۇل ساۋالعا الەكسەي سوي: «قازىرگى ۋاقىتتا ءبىز دە مۇنداي اقپاراتتى الىپ وتىرمىز. بىلۋىمىزشە، قازىرگى ۋاقىتتا ول كوممەرتسيالىق قۇرىلىمدا جۇمىس ىستەپ جاتىر»، - دەپ جاۋاپ بەردى.
ايتا كەتەيىك، بۇگىن ەلىمىزدە QazVac ۆاكسيناسىمەن ۆاكسيناتسيالاۋ باستالىپ، ۆاكسينانى تىكەلەي ەفير بارىسىندا العاشقىلاردىڭ ءبىرى بولىپ دەنساۋلىق ساقتاۋ ءمينيسترى الەكسەي سوي العان ەدى.
