قاراعاندىلىق جاس كاسىپكەر قىمىز بەن ساۋمال وندىرەدى
بيزنەستى كەڭەيتۋ تۋرالى كوپتەن ويلانعان، ءبىراق قارجىسى جەتىسپەگەن. وتكەن جىلى ول جاستار كاسىپكەرلىگىن قولداۋ جانە دامىتۋعا ارنالعان قاراعاندى وبلىسى اكىمىنىڭ گرانتىنا يە بولدى، دەپ حابارلايدى قازاقپارات ءتىلشىسى.
ءبىر ميلليون تەڭگە كولەمىندەگى بارلىق قاراجات بىردەن قىمىزدى شايقاۋعا ارنالعان اپپاراتتارعا جۇمسالدى. الماز ءتورت كۇبى ساتىپ الدى: ەكەۋى ەلەكتر جەلىسى ارقىلى، ەكەۋى قولمەن ساپىرۋعا ارنالعان.
«بۇل كاسىبىمىز ءۇشىن ۇلكەن كومەك. قازىر مەندە 10 بيە بار. قاراجات بولسا، مەن تاعى دا جىلقى ساتىپ الار ەدىم. ءبىراق بارىنەن بۇرىن ماعان جايىلىمدىق جەر جەتىسپەيدى. مەن مال شارۋاشىلىعى باعىتىندا ودان ءارى جۇمىسىمدى كەڭەيتۋگە تىرىسامىن. بۇل ماعان وتە ۇنايدى. اتا- اناما راحمەت. ولار مەنى قولدايدى جانە كومەكتەسەدى ، - دەيدى الماز اق جۇرەگىنەن اقتارىلا.
تاڭعىشبايەۆتار وتباسىنىڭ ءسۇت ونىمدەرىن نەگىزىنەن جەرگىلىكتى تۇرعىندار تۇتىنادى. قىمىز بەن ساۋمالدىڭ ءبىر بولىگىن قاراعاندىدا وتكىزەدى. تۇراقتى ساتىپ الۋشىلار دا بار.
«جاڭا ساۋىلعان بيە ءسۇتىنىڭ دەنساۋلىققا پايدالى ەكەنىن ءبارى بىلەدى. يممۋنيتەتتى جاقسارتادى، اۋىر دەرتتەرمەن كۇرەسۋگە كومەكتەسەدى. بالالارعا دا، قارتتارعا دا جارايدى. ءبىز ءوزىمىز دە ىشەمىز»، - دەيدى كاسىپكەر.
كۇندەلىكتى اۋىر ەڭبەككە قاراماستان، الماز سۇيىكتى ءىسىن تاستامايدى. ول كەلەشەكتە قالاداعى دۇكەندەردىڭ بىرىندە ءوز ءونىمىن ساتاتىن بولىمشە اشىپ، ساۋمالدىڭ پايداسىن باسقا دا ادامدار كورگەنىن قالايدى.
