ارمەنيادان اكەلىنگەن كولىكتەرگە ەكى رەت سالىق سالىنبايدى

2006 -جىلعى 6-قاراشاداعى تابىس پەن مۇلىككە سالىناتىن سالىققا قاتىستى قوسارلانعان سالىق سالۋدى بولدىرماۋ جانە سالىق سالۋدان جالتارۋعا جول بەرمەۋ تۋرالى كونۆەنسيانىڭ ەرەجەلەرىنە سايكەس قازاقستان جانە ارمەنيا قارجى مينيسترلىكتەرى قوسارلانعان سالىق سالۋدى بولدىرماۋ ماقساتىندا كولىك قۇرالدارىنا سالىق سالۋ بويىنشا ءوزارا ۋاعدالاستى.

«ءبىزدىڭ ازاماتتارىمىز قازاقستان رەسپۋبليكاسىنىڭ اۋماعىنا اكەلگەن اۆتوموبيلدەر بۇگىنگى كۇنگە دەيىن ارمەنيا رەسپۋبليكاسىنىڭ ۋاكىلەتتى ورگاندارىندا تىركەۋ ەسەبىنەن شىعارىلماعاندىقتان، ەكى مەملەكەت تە وسىنداي كولىك قۇرالدارىنا سالىق سالۋعا ۇمىتكەر بولا الادى. وسىلايشا، كەلىسسوزدەر ناتيجەسىندە ارمەنيا رەسپۋبليكاسىنان 2020 -جىلعى 1-اقپانعا دەيىن اكەلىنگەن، مەنشىك قۇقىعى بويىنشا قازاقستان رەسپۋبليكاسىنىڭ رەزيدەنتتەرىنە تيەسىلى اۆتوموبيلدەرگە كونۆەنسيانىڭ 21-بابى 4-تارماعىنىڭ ەرەجەلەرىنە سايكەس قازاقستان رەسپۋبليكاسىنىڭ ىشكى ىستەر ورگاندارىندا تىركەۋ ەسەبىنە قويىلعان ساتتەن باستاپ ۇلتتىق زاڭناماعا سايكەس قازاقستان رەسپۋبليكاسىندا عانا سالىق سالىنۋعا جاتادى دەگەن ۋاعدالاستىققا قول جەتكىزىلدى. وسى ماقساتتار ءۇشىن ەكى مەملەكەتتىڭ سالىق ورگاندارى قازاقستان رەسپۋبليكاسىندا تىركەلگەن كۇنىن كورسەتە وتىرىپ، تىركەلگەن كولىك قۇرالدارى بويىنشا مالىمەتتەر الماسۋدى جۇرگىزەتىن بولادى. مۇنداي كولىك قۇرالدارىنا قاتىستى قوسارلانعان سالىق سالۋ تۋىندامايدى»، - دەپ اتاپ ءوتتى ق ر ق م.

قازاقستان رەسپۋبليكاسى سالىق كودەكسىنىڭ نورمالارىنا سايكەس كولىك سالىعىن تولەۋ مىندەتى كولىك قۇرالىن قازاقستان رەسپۋبليكاسىنىڭ مەملەكەتتىك ورگاندارىندا ەسەپكە قويعان كەزدەن باستاپ تۋىندايدى.

مىسالى، ەگەر كولىك قۇرالى 2020 -جىلعى 1-قاراشادا تىركەۋ ەسەبىنە قويىلسا، 2021 -جىلعى 1-ساۋىردەن كەشىكتىرمەي 2020 -جىلعى قاراشا مەن جەلتوقسان ءۇشىن بيۋدجەتكە كولىك سالىعىن تولەۋ قاجەت. ولاي بولماعان جاعدايدا ءاربىر مەرزىمى وتكەن كۇن ءۇشىن ءوسىمپۇل ەسەپتەۋ جۇزەگە اسىرىلادى.