11:08, 19 - ءساۋىر 2021 | GMT +6
گولوۆكين الەم چەمپيونىمەن جەكپە- جەك تۋرالى كەلىسسوز جۇرگىزۋدە
نۇر- سۇلتان. قازاقپارات - قازاقستاندىق بوكسشى گەننادي گولوۆكين (41-1-1، 36 ك و) جىل سوڭىندا جاپوندىق ريوتا مۋراتامەن (16-2، 13 ك و) جەكپە- جەككە شىعۋدى جوسپارلاپ وتىر، دەپ حابارلايدى قازاقپارات Sports.kz سايتىنا سىلتەمە جاساپ.
العاشقى بولىپ بۇل جاڭالىقتى DAZN ءتىلشىسى كريس مەننيكس حابارلاعان: «دەرەككوزدەر مالىمەتىندە، گولوۆكين مەن مۋراتانىڭ وكىلدەرى جاپونيادا بىرلەسكەن جەكپە- جەك وتكىزۋ تۋرالى تالقىلاۋ جۇرگىزگەن. جەكپە- جەك جەلتوقساننىڭ اياعىنا، جاڭا جىل جانە جاپونياداعى بوكس كۇنى قارساڭىنا جوسپارلانۋدا».
كەيىن بۇل اقپاراتتى گولوۆكيننىڭ پروموۋتەرى ەددي حيرن راستادى: «گەننادي مۋراتامەن جەكپە- جەكتى 31 -جەلتوقسانعا جوسپارلاپ وتىر».
سونىمەن قوسا حيرن گولوۆكيننىڭ بۇعان دەيىن امەريكالىق دەمەتريۋس اندرادەمەن (30-0, 18 ك و) تاعى ءبىر بىرلەسكەن جەكپە- جەك وتكىزەتىنىنە سەنىم ءبىلدىردى.