ايجان ەسماعامبەتوۆا نەلىكتەن ۆاكسينانىڭ قوس كومپونەنتى كەرەك ەكەنىن ءتۇسىندىردى
«سپۋتنيك V « ۆاكسيناسىن دايارلاۋشىلار كوروناۆيرۋسپەن اۋىرىپ شىققاندار ەكپەنىڭ تەك ءبىرىنشى كومپونەنتىن سالدىرا الاتىنىن مالىمدەدى. كەيبىر ەلدەردە وسىنداي تاجىريبە ەسكەرىلگەن، ياعني ىندەتتەن جازىلعاندار ۆاكسينانىڭ ءبىر عانا كومپونەنتىن الادى. قازاقستاندا مۇنداي مۇمكىندىك ەسكەرىلگەن بە؟»، - دەپ سۇرادى ءتىلشى ورتالىق كوممۋنيكاتسيالار قىزمەتىندە وتكەن بريفينگتە.
ءوز كەزەگىندە ايجان ەسماعامبەتوۆا ۆاكسينا ءتيىستى بەكىتىلگەن ەرەجە بويىنشا جاسالاتىنىن جەتكىزدى.
«ارنايى ەرەجەگە سايكەس، ۆاكسينانىڭ قوسارلانعان دوزاسى پايدالانىلادى، ياعني ءبىرىنشى جانە ەكىنشى كومپونەنتى قامتىلعان. سوندىقتان ءبىز وسى ەرەجەنى ۇستانامىز. جاڭا مالىمەتتەر پايدا بولسا نەمەسە ءتيىستى وزگەرىستەر ەنگىزىلسە، وندا ونى قاراستىرامىز. جالپى، دۇنيەجۇزىلىك دەنساۋلىق ساقتاۋ ۇيىمى كوروناۆيرۋس ينفەكسياسىنا قارسى ەكى دوزانى قامتۋعا كەڭەس بەردى»، - دەدى كوميتەت باسشىسى.
بۇدان بۇرىن حابارلانعانداي، ق ر دەنساۋلىق ساقتاۋ ءمينيسترى الەكسەي سوي كوروناۆيرۋسقا قارسى ۆاكسينانىڭ ءبىرىنشى جانە ەكىنشى كومپونەنتى قانشا ادامعا سالىنعانىن ايتتى.
اۆتور: رۋسلان عابباسوۆ
