سەرىك قوجانيازوۆ: بالقاشقا ارال تاعدىرىن قايتالاۋ قاۋپى ءتونىپ تۇرعان جوق
ۆيتسە- ءمينيستردىڭ سوزىنە قاراعاندا، بالقاش كولى ەكولوگيالىق اپاتقا ۇشىراماۋى ءۇشىن جىل سايىن 12 تەكشە شاقىرىم سۋ قۇيىلۋى كەرەك. ماماندار كوپ جىلعى زەرتتەۋلەر ناتيجەسىندە وسىنداي تۇجىرىم جاساعان.
«قىتايمەن كەلىسسوزدەر اياسىندا ءبىزدىڭ ەلدىڭ ۇستانىمى سۋ ءبولىسۋ كەزىندە ەكوجۇيەنى ەسكەرۋ كەرەك دەگەنگە سايادى. وسىعان بايلانىستى قازاقستان تاراپى بالقاش كولىن ىلەنىڭ سۋىن نەگىزگى تۇتىنۋشى نىسان دەپ كورسەتىپ ءجۇر. كەلىسسوزدەر كەزىندە بالقاشتىڭ ەكولوگيالىق جاعدايى ىلەدەن كەلەتىن سۋعا تاۋەلدى ەكەنىن ايتۋدىڭ ءبىر دە ءبىر مۇمكىندىگىن جىبەرىپ كورگەن جوقپىز. عالىمدار وزدەرىنىڭ كوپجىلعى زەرتتەۋلەرىنە سۇيەنىپ، بالقاش كولىنىڭ امان تۇرۋى ءۇشىن بالتىق جۇيەسى بويىنشا 341 مەتر دەڭگەيدە ساقتالۋ كەرەك دەپ توپشىلايدى. كەيىنگى 10 جىلدا كولدىڭ دەڭگەيى 340 مەتردەن تۇسپەگەنىن ايتۋ كەرەك»، - دەيدى مينيسترلىك وكىلى.
سونداي- اق، دوبىن شەكارالىق بەكەتىندەگى گيدروگوليالىق دەرەكتەردى تالداۋ كەزىندە ىلەنىڭ كوپجىلدىق ورتاشا اعىنى 2001-2020 -جىلدار الالىعىندا 13,8 تەكشە شاقىرىم بولعانىن ءمالىم ەتتى.
«بالقاشقا جىل سايىن 12 تەكشە شاقىرىم سۋ كەلىپ وتىرسا، كولدىڭ دەڭگەيى تۇراقتى ساقتالۋىنا كەپىل بولا الادى. مالىك بورلىبايەۆتىڭ مالىمدەمەسىنەن كەيىن بۇل ماسەلە بارلىق الەۋمەتتىك جەلىلەردە كەشەدەن بەرى قىزۋ تالقىلانىپ جاتىر. سولارعا جاۋاپ رەتىندە مىنانى ايتقىم كەلەدى. جوعارىدا ءوزىم كەلتىرگەن دەرەكتەردى نەگىزگە الا وتىرىپ، «بالقاشقا ارالدىڭ تاعدىرىن قايتالاۋ قاۋپى ءتونىم تۇرعان جوق» ەكەنىن ايتامىن. قىتاي تاراپىمەن كەلىسسوزدەر كەزىندە ىلەدەن كىرەتىن سۋدىڭ اعىنىن جىلىنا 12 تەكشە شاقىرىمنان كەم بولماۋ كەرەك دەگەن ناقتى ۇستانىم ايتىپ كەلەمىز. سۋ بۇدان تومەن بولماسا، بالقاشقا قۇرۋ قاۋپى تونبەيدى»، - دەدى ءمينيستردىڭ ورىنباسارى.
سەرىك قوجانيازوۆ قىتاي تاراپى دا ءوزىنىڭ شەكاراسىنىڭ ماڭىندا ەكولوگيالىق اپات بولعانىن قالامايدى دەگەن بولجام ايتتى. «بۇلاي دەۋىمە بىرلەسكەن كوميسسيانىڭ 17-وتىرىسىندا قىتاي تاراپىنىڭ كەلىسىم جوباسىن تالقىلاي كەلىپ، ەكى جاقتاعى ەكوجۇيەنى دامىتۋ جانە ساقتاۋ تۋرالى ۇسىنىستارعا كەلىستى. بۇل بالقاش كولىنىڭ ەكولوگياسى ءۇشىن ماڭىزدى»، - دەدى ۆيتسە- مينيستر.
اۆتور: ەسىمجان ناقتىباي
