قىزىلوردادا كوروناۆيرۋس جۇقتىرعاندار سانى ارتتى

ولاردىڭ باسىم بولىگى قاتەرلى ۆيرۋس جۇقتىرعان ناۋقاستارمەن جاقىن قارىم-قاتىناستا بولعاندار اراسىنان انىقتالعان، دەپ حابارلايدى قازاقپارات ءتىلشىسى.

وتكەن تاۋلىكتە وبلىستا 39 ادام كوروناۆيرۋس جۇقتىرعان. وسىعان بايلانىستى وبلىستىڭ باس مەملەكەتتىك سانيتاريالىق دارىگەرى دينارا جاڭابەرگەنوۆا ۇندەۋ جاريالادى.

وندا جۇمىس ورىندارىنداعى سانيتاريالىق-ەپيدەميولوگيالىق، دەزينفەكتسيالىق تالاپتاردىڭ ورىندالۋىنا ءجىتى ءمان بەرۋدى سۇراعان.

بۇگىنگى كۇنى وبلىس بويىنشا كوروناۆيرۋستىق ينفەكتسيا جۇقتىرعاندار سانى 4198 ادامعا جەتتى.

ونىڭ 3 پايىزى سىرتتان تاسىمالدانعان بولسا، 56 پايىزى سكرينينگتىك تەكسەرۋ ناتيجەسىندە انىقتالعان.

ال 41 پايىزى قارىم-قاتىناس ارقىلى جۇقتىرعان. وڭىردە كارانتين تالاپتارى كەزەڭ-كەزەڭىمەن جەڭىلدەتىلگەن.

دەگەنمەن ءبىرقاتار شەكتەۋلەر ءالى دە ساقتالۋدا. ءبىراق توي جاساۋ، سالتاناتتى شارالار وتكىزۋ تىيىلماي تۇر. ارنايى مونيتورينگتىك توپ جىل باسىنان بەرى وتباسىلىق 28 توي-جيىن وتكىزگەن دەگەن دەرەك انىقتالدى.

ەسكە سالايىق، قازىر تەك شەكتەۋلى ادامدار سانىمەن تەك اس بەرۋگە رۇقسات ەتىلگەن.

«ءاربىر تۇرعىننىڭ ۆيرۋستىڭ تارالۋىن توقتاتۋعا مۇمكىندىگى بار. ول بەتپەردە كيۋ، جەكە گيگيەنا تالاپتارىن، قوعامدىق ورىنداردا اراقاشىقتىق ساقتاۋمەن بايلانىستى. سونداي-اق دەنە قىزۋى كوتەرىلىپ، جوتەل جانە تىنىس الۋ قيىنداعان جاعدايدا مەديتسينالىق كومەككە جۇگىنۋگە شاقىرامىن. ادامدار كوپ شوعىرلاناتىن ورىندارعا بارۋدى، شەكتەن تىس قوناق شاقىرىپ، وتباسىلىق مەرەكەلەردى تويلاۋدى كەيىنگە قالدىرۋدى سۇرايمىن. ءاربىر تۇرعىن ماماندار كەڭەسىنە قۇلاق اسىپ، كارانتين تالاپتارىن ورىنداسا ينفەكتسيانىڭ دا تارالۋىن تەجەۋگە مۇمكىندىك بولادى. جاۋاپكەرشىلىك ورتاق - قاۋىپسىزدىك تە ورتاق»، - دەدى دينارا جاڭابەرگەنوۆا.

ەستەرىڭىزگە سالا كەتەلىك، بۇدان بۇرىن قىزىلوردا وبلىسىندا 7119 ادام كوروناۆيرۋسقا قارسى ەكپە سالدىردى.