ق ر س ءى م يوردانياداعى جاعدايعا قاتىستى مالىمدەمە جاسادى

نۇر- سۇلتان. قازاقپارات – ق ر سىرتقى ىستەر مينيسترلىگى تاياۋ شىعىستاعى نەگىزگى سەرىكتەستەرىنىڭ ءبىرى بولىپ تابىلاتىن يوردان حاشيميت كورولدىگىندە ورىن العان وقيعانى مۇقيات باقىلاۋدا، دەپ حابارلايدى قازاقپارات مينيسترلىكتىڭ رەسمي سايتىنا سىلتەمە جاساپ.

قازاقستان كورول ابداللا II يوردانيا حالقىنىڭ ءال- اۋقاتىن جاقسارتۋعا، ايماقتىق تۇراقتىلىق پەن الەمدىك قاۋىپسىزدىكتى قامتاماسىز ەتۋگە باعىتتالعان ساياساتىن قۋاتتايدى. قازاقستان يوردانيا باسشىلىعىنىڭ ىشكى ساياسي تۇراقتىلىقتى ساقتاۋ جولىندا قابىلداعان شارالارىن تولىق قولدايدى. وسىعان دەيىن يوردانيا قاۋىپسىزدىك قىزمەتى قاۋىپسىزدىك ماقساتىندا بىرنەشە جوعارى لاۋازىمدى تۇلعانى قاماۋعا العانىن حابارلاعان بولاتىنبىز.

ايتا كەتەيىك، 3 -ءساۋىر كۇنى يوردانيا بيلىگى كەي ادامداردى «قاۋىپسىزدىك ماقساتىندا» قاماۋعا الدى. ونىڭ ىشىندە II ابداللا كورولدىڭ سەنىمدى وكىلى باسسەم اۆاداللاح جانە كورولدىڭ بۇرىنعى ەلشىسى حاسان بين زايد بار.

The Washington Post گازەتىنىڭ حابارلاۋىنشا، ىقتيمال قاستاندىق ارەكەتىن تەرگەۋ بارىسىندا مارقۇم كورول حۋسەيننىڭ ۇلكەن ۇلى حانزادا حامزا بەن حۋسەينگە اممانداعى سارايىندا قالۋعا بۇيرىق بەرىلدى. Petra اگەنتتىگى كەيبىر بۇقارالىق اقپارات قۇرالدارىندا حانزادا حامزا بەن حۋسەيننىڭ ءۇي قاماۋىندا ەكەندىگى جايلى اقپاراتتى جوققا شىعاردى. ارميا شتابىنىڭ باستىعى گەنەرال يۋسەف حۋنەيتي دە حانزادا حامزانىڭ تۇتقىندالماعانىن، تەرگەۋدىڭ ءالى دە جالعاسىپ جاتقانىن جانە ناتيجەسى «اشىق ءارى تۇسىنىكتى تۇردە» جاريا بولاتىنىن ايتتى.