كوروناۆيرۋسپەن كۇرەس: ءدارى-دارمەك جەتكىلىكتى مە
بۇل تۋرالى بۇگىن ۇكىمەت وتىرىسىندا ق ر دەنساۋلىق ساقتاۋ ءمينيسترى الەكسەي سوي ايتتى، دەپ حابارلايدى قازاقپارات ءتىلشىسى.
«بۇگىندە ەلىمىز دارىلىك زاتتاردىڭ جانە مەديتسينالىق بۇيىمداردىڭ قاجەتتى كولەمىمەن تولىق قامتاماسىز ەتىلگەن. اۋرۋحانالاردا ك ۆ ي- دەن ەمدەۋگە ارنالعان ءدارىنىڭ ءبىر ايلىق قورى، ال «س ق- فارماتسيا» قويمالارىندا جانە ءدارىحانالاردا 2 ايلىق قورى جاساقتالعان. بارلىق وڭىردە 18 ميلليارد تەڭگەنىڭ دارىلىك زاتتارىنىڭ تۇراقتاندىرۋ قورى قۇرىلعان»، - دەدى ول.
ءمينيستردىڭ اتاپ وتۋىنشە، وتكەن جىلدىڭ تامىز ايىنان بەرى اۋرۋحانالار مەن ءدارىحانالارعا جۇكتەمەنى تومەندەتۋ ماقساتىندا ك ۆ ي- دەن ەمدەۋگە ارنالعان ءدارىنىڭ 5 ءتۇرى امبۋلاتورلىق دەڭگەيدە تەگىن بەرىلەدى. مۇنداي دارىلىك زاتتاردىڭ 1 ميلليون ادامعا جەتەتىن قورى بار. سونىمەن قاتار كوروناۆيرۋسقا قارسى 232 پرەپاراتتىڭ قۇنى ورتاشا ەسەپپەن 27 پايىزعا تومەندەتىلگەن.
«مەديتسينالىق ماسكالار ورتاشا ەسەپپەن 20 تەڭگەدەن ەركىن ساتىلىپ جاتىر. قويمالاردا 21,5 ميلليون دانا كولەمىندە جەتكىلىكتى قور بار. مەديتسينا ۇيىمدارى جەكە قورعانىس زاتتارىمەن تولىق قامتاماسىز ەتىلگەن. ءوڭىر اكىمدىكتەرى 3 ايلىق قور جاساقتاپ قويدى»، - دەدى الەكسەي سوي.
