كوروناۆيرۋستىڭ ورشۋىنە جاڭا شتامدار تۇرتكى بولدى - الەكسەي سوي

نۇر- سۇلتان. قازاقپارات - ەلىمىزدە كوروناۆيرۋستىڭ ورشۋىنە جاڭا شتامدار تۇرتكى بولدى. بۇل تۋرالى بۇگىن ۇكىمەت وتىرىسىندا ق ر دەنساۋلىق ساقتاۋ ءمينيسترى الەكسەي سوي ايتتى، دەپ حابارلايدى قازاقپارات ءتىلشىسى.

«ناۋقاس تانۋ ءوسىمى بريتاندىق جانە وڭتۇستىكافريكالىق شتامداردىڭ اينالىمىمەن بايلانىستى بولىپ وتىر. وسىعان وراي ءوڭىر اكىمدەرى ينفەكتسيالىق توسەك- ورىندارمەن جانە العاشقى مەديتسينالىق- سانيتارلىق كومەكتىڭ ءموبيلدى بريگادالارىمەن قامتاماسىز ەتۋ بويىنشا شۇعىل ءىس- شارالار قابىلداۋى قاجەت»، - دەدى دەنساۋلىق ساقتاۋ ءمينيسترى.

سونىمەن قاتار ول ءساۋىر ايىندا پتر تەستىلەۋ سانىنىڭ ارتقانىن ايتادى.

«ەپيدەميولوگيالىق احۋالدى ەسكەرە وتىرىپ، ساۋىردە تەستىلەۋدىڭ تاۋلىكتىك سانىنىڭ 57 مىڭ زەرتتەۋگە دەيىن ارتقانى بايقالادى. بۇل قولدانىستاعى زەرتحانالاردىڭ تاۋلىكتىڭ قۋاتىنىڭ 50 پايىزىن قۇرايدى جانە اقپانمەن سالىستىرعاندا 1,6 ەسە ارتىق»، - دەدى الەكسەي سوي.