الماتىدا كوروناۆيرۋسقا قارسى جاپپاي ۆاكسيناتسيا بىرنەشە كۇنگە شەكتەلەدى

الماتى. قازاقپارات - الماتىدا كوروناۆيرۋسقا قارسى ۆاكسيناتسيا بىرنەشە كۇنگە شەكتەلەدى.

بۇل تۋرالى ونلاين بريفينگ بارىسىندا قالالىق قوعامدىق دەنساۋلىق ساقتاۋ باسقارماسىنىڭ باستىعى ناريمان تابىنبايەۆ ءمالىم ەتتى، دەپ حابارلايدى قازاقپارات ءتىلشىسى.

«ەكى كۇن ىشىندە الماتى قالاسىنىڭ 17 مىڭنان اسا تۇرعىنىنا ۆاكسينا سالىندى. اۋرۋحانالاردان بولەك، Asia Park ساۋدا ويىن- ساۋىق ورتالىعى مەن رەسپۋبليكا سارايىندا ۆاكسيناتسيا جۇرگىزىلدى. بۇگىن كەم دەگەندە 10000 ادامعا ۆاكسينا سالىنادى دەپ ويلايمىن. 3-4 كۇندە ۆاكسينانىڭ جاڭا پارتياسى كەلەدى. جاڭا پارتيا جەتكىزىلگەنگە دەيىن ۆاكسيناتسيانى شەكتەۋ قاجەت بولادى. قالعانىن تەك دەنساۋلىق ساقتاۋ مينيسترلىگى ۇسىنعان ادامدار كونتينگەنتىنە سالۋعا تىرىسامىز. ەرتەڭ ەكپە جاسالادى، ءبىراق سوڭعى ەكى كۇندەگىدەي ەمەس، شەكتەۋلى مولشەردە»، - دەدى ول.

ناريمان تابىنبايەۆ الماتىلىقتاردى الاڭداماۋعا شاقىرىپ، ساۋىردە ۆاكسينا جەتكىلىكتى بولاتىنىن ايتتى. «ءساۋىر ايىندا ۆاكسينا جەتكىلىكتى بولادى دەپ ويلايمىن. ءبىز ۆاكسيناتسيانى تەك مەديتسينالىق مەكەمەلەردە عانا ەمەس، حالىقتى كەڭىنەن قامتۋ ءۇشىن دايىندالعان ۆاكسيناتسيا پۋنكتەرىندە دە جاساۋ كەرەكتىگىن تۇسىندىك. ءبىز ەرتەڭ ۆاكسيناتسيا جاسايمىز، ءبىراق شەكتەۋلى مولشەردە. وسى ەكى كۇندەگىدەي اۋقىمدا ەمەس»، - دەدى قالالىق قوعامدىق دەنساۋلىق ساقتاۋ باسقارماسىنىڭ باستىعى.

اۆتور: الما مۇقانوۆا