ۆاكسينا سالدىرۋ ءۇشىن تۇرعىلىقتى جەرى بويىنشا تىركەلۋ كەرەك پە
بۇل ساۋالعا ونلاين بريفينگ بارىسىندا قالالىق قوعامدىق دەنساۋلىق ساقتاۋ باسقارماسىنىڭ باستىعى ناريمان تابىنبايەۆ جاۋاپ بەردى، دەپ حابارلايدى قازاقپارات ءتىلشىسى.
ونىڭ ايتۋىنشا، الماتىلىقتاردىڭ باسىم بولىگى ۆاكسينانى تىركەلگەن ەمحانالارىندا سالدىرادى.
«ەگەر ول الماتى قالاسىنىڭ تۇرعىنى بولسا جانە جۇمىس ورنى بويىنشا جاقىن كلينيكاعا جۇگىنسە، وندا ودان ەشكىم باس تارتپايدى. بىزدە قالاعا كەلىپ، وسىندا جۇمىس ىستەيتىن ادامدار بار. مىسالى، الماتىدا جۇمىس ىستەيتىن مەديتسينا قىزمەتكەرلەرىنىڭ %30 قالا سىرتىنان كەلەتىندەر. قالالىق دەنساۋلىق ساقتاۋ باسقارماسى مەديتسينالىق مەكەمەلەرگە جۇمىس ورنىندا ۆاكسينا ەگۋگە رۇقسات بەردى. الماتىدا تۇراتىنداردىڭ بارلىعىنا ەكپە قولجەتىمدى. ەگەر ولار تىركەلگەن ەمحاناسىندا سالدىرعىسى كەلسە، جازىلىپ، كەزەككە تۇرا الادى»، - دەدى ول. بۇعان دەيىن ناريمان تابىنبايەۆ الماتىدا كوروناۆيرۋسقا قارسى ۆاكسيناتسيا بىرنەشە كۇنگە شەكتەلەتىنىن ءمالىم ەتكەن بولاتىن.
اۆتور: الما مۇقانوۆا
