جاپپاي ۆاكسيناتسيا باستالدى: حالىق نە دەپ جاتىر

نۇر-سۇلتان. قازاقاپارات - ۆاكسينا سالدىرعان قازاقستاندىقتار العان اسەرى مەن پىكىرىن الەۋمەتتىك جەلىلەردە ءبولىسىپ جاتىر.

قازاقپارات ءبىرقاتار پىكىرگە توقتالىپ، شولۋ جاسايدى.

«سپۋتنيك V» سالدىردىم. كوروناۆيرۋس ءورشىپ كەتكەندە، ۆاكسينا شىقسا سالدىرام دەپ ويلاپ ءجۇرۋشى ەدىم، ۆاكسينا سالدىرۋدىڭ رەتى بۇنشا تەز بولادى دەپ كۇتپەپپىن. تەراپيەۆتىم «سالدىراسىز با؟» دەدى، سوزگە كەلمەستەن تاۋەكەل دەدىم. بەلگىلى دارەجەدە رەاكسيا بولاتىنىن دا بىلەم، ءدال ماعان كەلگەندە سول رەاكسيا جەڭىل بولادى دەپ ۇمىتتەنەم. ەندى انتيدەنە قالىپتاسقانشا ساق بولۋ كەرەك»، - دەپ جازدى «31 ارنانىڭ» اقپاراتتىق باعدارلامالار ديرەكتورى بولات ءمۇرسالىم Facebook پاراقشاسىنا. جۋرناليست ايدوس جۇقان ۇلى دا ۆاكسينا ەكتىرىپ، وعان قاتىستى پىكىرىن Facebook پاراقشاسىندا جاريالادى.

«الماتى جۇرتىنىڭ تارتىپكە باعىنۋى قيىن. ىعى- جىعى حالىق. سابىلعان كولىك. تىرشىلىك ءۇشىن كۇرەس. كىرىپ شىققان قوناقتاردى، تىركەۋسىز ەلدى قوسقاندا بۇقارا سانى 3 ميلليونعا جۋىقتايدى. نۇر-سۇلتانداعىداي قاشىقتىق ساقتاپ، سول جاعادا جۇمىس ىستەگەن ءتۇر كورسەتىپ وتىرا المايسىڭ. ونىڭ ۇستىنە ناۋقاستار كۇننەن كۇنگە كوبەيىپ بارادى. سوندىقتان ساقتانباسا بولمايدى. ءوز ءومىرىم وزىمە كەرەك. قازاق ۆاكسيناسىن كۇتىپ جۇرگەندە تىراپاي اسارمىن دەپ بۇگىن ورىستىكىن ەكتىرتتىم. ۆاكسينا العاننان كەيىن ءبىرىنشى كۇندە ءبارى ويداعىداي بولدى، ەكىنشى كۇنى قانداي كۇيدە بولعانىمدى ەرتەڭ جازامىن»، - دەيدى ول. پاۆلودارلىق ينفەكسيونيست زارينا ەسكەندىروۆا دا الەۋمەتتىك جەلىدە ۆاكسينا الۋعا قاتىستى ويىن ءبولىستى.

«مەن نە سەبەپتى ۆاكسينا سالدىردىم؟ بىرىنشىدەن، جۇقپالى اۋرۋمەن اۋىراتىن ناۋقاستارمەن بايلانىستا بولامىن. بۇل - مەنىڭ جۇمىسىم، سوندىقتان ەشقانداي قورعانىس كيىمى اۋرۋ جۇقتىرمايسىڭ دەگەن كەپىلدىك بەرە المايدى. ەكىنشىدەن، ماۋسىم ايىندا ءوزىم دە اۋىردىم، ەندى ەكىنشى رەت اۋىرعىم كەلمەيدى. اۋىرعاننان كەيىن تۇراقتى يممۋنيتەت قالىپتاستاۋى مۇمكىن، ال ۆاكسينادان كەيىن تۇراقتى يممۋنيتەت قالىپتاسادى. ۇشىنشىدەن، مەن اتا-انا، تۋعان- تۋىستارعادا اۋرۋ جۇقتىراتىن ۆيرۋس تاسىمالداۋشىسى بولعىم كەلمەيدى. ولارمەن دە قارىم-قاتىناستا بولعاندىقتان، ولاردىڭ دا قاۋىپسىزدىگىن ويلاۋىم كەرەك. تورتىنشىدەن، مەن «سپۋتنيك V» ۆاكسيناسىنا سەنەمىن. ونىڭ كلينيكالىق سىناقتان قالاي وتكەنى تۋرالى تانىمال The Lancet جۋرنالىنا جاريالانعان. ونى الەمدەگى 45 مەملەكەت قولدانىپ جاتىر، بۇل - تانىمالدىق جاعىنان AstraZeneca-دان كەيىنگى ۆاكسينا»، - دەپ جازدى ول Instagram پاراقشاسىنا.

ەۋروپالىق قۇقىق جانە ادام قۇقىقتارى ينستيتۋتىنىڭ ديرەكتورى مارات ءباشىموۆ بويىن قورقىنىش بيلەسە دە، ۆاكسينا ەكتىرگەنىن جازدى.

«جەكسەنبى كۇنى بولعانىنا قاراماستان تۇرعىندارعا جاپپاي ۆاكسينا ەگۋ باستالدى. قورقىنىش سەزىمىنە قاراماستان مەن دە ۆاكسينا ەكتىردىم. ۆاكسينا جاساتىپ جاتقان جاستار كوپ. كەزەكتە تۇرعاندار كوپ. دارىگەرلەر مەن مەدبيكەلەر، پسيحولوگتار كىم قورقىپ تۇرعانىن بايقاپ قويادى. تاماعىمىزدى مۇقيات قاراپ، دەنە قىزۋى، قان قىسىمىن ولشەپ، دەنساۋلىققا قاتىستى باسقا دا سۇراقتار قويدى. اللەرگيامىز بار- جوعىن سۇرادى. ەكپە سالعاننان كەيىن 30 مينۋت وتىراسىڭ جانە قانداي كۇيدە وتىرعانىڭدى قاعازعا ءتۇسىرىپ بەرەسىڭ. №9-ەمحانا باسشىلىعىنىڭ ەكپە ەگۋ بويىنشا تاجىريبەسى بار. ولار جاعدايدى باقىلاۋدا ۇستاپ وتىر» دەپ جازادى مارات ءباشىموۆ. مۇعالىم الماس كۇنعوجين دە كوروناۆيرۋسقا قارسى ۆاكسينا ەكتىرگەن.

«كەشە مەن وزىمە COVID-19 عا قارسى ەكپەسىن سالعىزدىم. بۇل ۆاكسينانى سالدىرۋعا كوپتەگەن كۇماندانۋشىلارمەن بىرگە قارسىلاستاردىڭ بار ەكەنىن بىلەمىن. الايدا ينفەكسيانى جۇقتىرۋدىڭ جاناما اسەرلەرى مەن سالدارىن سالىستىرا كەلە، عىلىمي قاۋىمداستىق، باتىس جانە شىعىس ەلدەرىنىڭ كوروناۆيرۋسپەن كۇرەستەگى تاجىريبەسىنە سەنىم ءبىلدىردىم. قازىرگى جاعدايدا بىزگە بۇل ىندەتتى جەڭۋگە تەك جاپپاي ۆاكسيناتسيا عانا مۇمكىندىك بەرە الادى دەپ ويلايمىن»، - دەپ جازدى ول Facebook پاراقشاسىنا.

ەسكە سالا كەتسەك، بۇعان دەيىن الماتى قالاسىندا ءبىر تاۋلىكتە 10 مىڭعا جۋىق ادام كوروناۆيرۋسقا قارسى ۆاكسينا سالدىرعانىن جازعان بولاتىنبىز.

«3-ءساۋىر كۇنى 9975 الماتىلىققا كوروناۆيرۋسقا قارسى ەكپە سالىندى»، - دەپ حابارلادى الماتى قالاسى قوعامدىق دەنساۋلىق ساقتاۋ باسقارماسى.

اۆتور: زارينا قاھارمان