اقتوبەدە شوشقا فەرماسىنىڭ يەسى ءۇي قاماققا الىندى

اقتوبە. قازاقپارات - اقتوبەدە شوشقا فەرماسىنىڭ يەسىنە قاتىستى قىلمىستىق ءىس قوزعالدى، كاسىپكەر ءۇي قاماقتا وتىر، دەپ حابارلايدى قازاقپارات ءتىلشىسى.

اقتوبەدەگى شوشقا فەرماسىنا قاتىستى الدىمەن اكىمشىلىك ءىس قوزعالىپ، بارلىعى 7 ميلليارد تەڭگەدەن استام ايىپپۇل سالىندى. كەيىن سەرىكتەستىك قايتا اپپەلياتسيالىق شاعىم ءتۇسىردى. ال سول اپپەلياتسيالىق سوتتا ەكى ارىز شەشىمى وزگەرىسسىز قالدىرىلىپ، سوت ورىنداۋشىلارى زاڭ اياسىندا جۇمىسقا كىرىستى.

«قازىرگى ۋاقىتتا اقتوبە وبلىسى بويىنشا جەكە سوت ورىنداۋشىلارى وڭىرلىك پالاتاسىنا ەكى اتقارۋ پاراعى ءتۇستى. ءبىرىنشىسى كوڭ قويماسىن پايدالانۋ، ەكىنشىسى اعىندى سۋلاردىڭ قورشاعان ورتانى لاستاۋى. سوت ورىنداۋشىلارى بورىشكەرگە سوت شەشىمدەرىن ورىنداۋ تۋرالى حابارلاما بەردى. مەرزىمى ءبىر اپتا. ءبىراق اتقارىلۋى ءتيىس ءىس اۋقىمى كوپ. ءبىر اپتادا ۇلگەرۋى نەعايبىل»، - دەدى اقتوبە وبلىسى بويىنشا جەكە سوت ورىنداۋشىلارى وڭىرلىك پالاتاسى باسشىسىنىڭ ورىنباسارى قايرات تاڭقايەۆ.

سونىمەن بىرگە شوشقا فەرماسىنىڭ يەسىنە قاتىستى قىلمىستىق ءىس قوزعالدى.

«ەكولوگيا دەپارتامەنتىنىڭ تەكسەرۋىنەن سوڭ قىلمىستىق ءىس قوزعالدى. قىلمىستىق كودەكستىڭ «جەردى ءبۇلدىرۋ» بابى بويىنشا تەرگەۋ ءجۇرىپ جاتىر. سەرىكتەستىك باسشىسى گايك تەرتەريان ءۇي قاماقتا وتىر. كۇدىكتىنىڭ كىناسى دالەلدەنسە، 5 جىلعا دەيىن باس بوستاندىعىنان ايىرىلۋى مۇمكىن»، - دەدى وبلىستىق پ د تەرگەۋ باسقارماسىنىڭ اعا تەرگەۋشىسى ايگۇل يمانعازينا.