ەلورداداعى كينوتەاترلار مەن قوناقۇيلەردە ەگۋ پۋنكتەرى اشىلۋى مۇمكىن
بۇل جايىندا نۇر- سۇلتان قالاسىنىڭ اكىمى التاي كولگىنوۆ Instagram پاراقشاسىندا جازدى، دەپ حابارلايدى قازاقپارات.
«كاسىپكەرلەرىمىز الەۋمەتتىك جاۋاپكەرشىلىك تانىتىپ، ەگۋ پۋنكتتەرىن ارتتىرۋ ءۇشىن ءوز الاڭدارىن ۇسىنىپ وتىرعانى قۋانتادى. مىسالى، نۇرلان سماعۇلوۆ «Mega Silk Way» س و و كينوتەاترلارىن ەگۋ پۋنكتەرىنە جابدىقتاۋدى ۇسىندى. سونداي- اق قوناق ءۇي يەلەرىنەن ۇسىنىستار ءتۇستى. قالانىڭ سانيتارلىق دارىگەرىنە، باسقارمالارعا بارلىق قاجەت ينفراقۇرىلىمدى دايىنداۋدى تاپسىردىم»، - دەدى التاي كولگىنوۆ.
ونىڭ اتاپ وتۋىنشە، مەملەكەت باسشىسىنىڭ تاپسىرماسىنا سايكەس شاعىن جانە ورتا بيزنەس وكىلدەرىنە قولداۋ كورسەتىلەدى. مىسالى، بەيىندى ۆەدومستۆولار ءبىرقاتار كاسىپكەرلىك وبەكتىلەرىنە QR- كود بەرۋگە، كىرەبەرىستە كەلۋشىلەردىڭ ەپيدستاتۋسىن سكانەرلەۋگە مۇمكىندىك بەرەتىن «Ashyq» ءموبيلدى قوسىمشاسىن ىسكە قوستى. وسىلايشا، قاتاڭ سانيتارلىق نورمالاردى ساقتاي وتىرىپ، كاسىپكەرلىك وبەكتىلەرى ءوز قىزمەتىن قايتا باستادى. «Ashyq» جۇيەسىنىڭ قاعيداتى بويىنشا جۇمىس ىستەي الاتىن وبەكتىلەر ءتىزىمىن كەڭەيتۋدى جوسپارلاپ وتىرمىز»، - دەدى قالا باسشىسى.
سونىمەن قاتار التاي كولگىنوۆ مەملەكەت باسشىسىنىڭ تاپسىرماسىنا سايكەس، بەيىندى ورگاندار شوب- تىڭ سالىقتار مەن كرەديتتەر بويىنشا تولەمدەرىن كەيىنگە قالدىرۋ، سالىقتىق جانە كەدەندىك بەرەشەكتى ماجبۇرلەپ ءوندىرىپ الۋدى توقتاتا تۇرۋ سىندى قوسىمشا ءىس- شارالاردى قابىلداۋ جۇمىسىن جۇرگىزىپ جاتقانىن ايتادى.
