جابال ەرعاليەۆ: ادام بالاسىن شەشەك، بەزگەك سياقتى ىندەتتەردەن امان الىپ قالعان – ۆاكسينا
ونىڭ ايتۋىنشا، قازىر جالعىز قازاق ەلىندە عانا ەمەس، الەمدە ءبىر الاڭ جاعداي قالىپتاسىپ وتىر. ءبىر- ەكى جىلدىڭ اياسىندا الەم بويىنشا تاراي باستاعان كورونوۆيرۋس ىندەتى دۇنيەنىڭ دامۋىنا ەلەۋلى وزگەرىستەر اكەلىپ جاتىر. ىندەتتىڭ بەتى قايتتى دەپ ايتا قويۋدىڭ ءوزى ءالى دە ەرتەرەك. كۇن سايىن بەرىلىپ جاريالانىپ جاتقان ستاتيستيكالىق مالىمەتتەر بويىنشا الەم بويىنشا ىندەتتىڭ تارالۋى باسەڭسي قويعان جوق. جەر بەتىندە وسى ىندەتتەن ادام شىعىنى دا ازايعان ەمەس. ادام بالاسىنا كەلگەن وسى ىندەتتىڭ الدىن الۋ، تارالىپ كەتۋىن نەعۇرلىم ازايتۋ ماقساتىندا ءبىزدىڭ ەلىمىزدە بارلىق شارالار قولدانىلىپ جاتقانىنىن دا ەشكىم جوققا شىعارا المايدى.
«مەملەكەت باسشىسىنىڭ پارمەنىمەن بىلتىر توتەنشە جاعداي جاريالانىپ، كارانتين ەنگىزىلگەنى، حالىققا ماتەريالدىق قولداۋ جاسالۋى، بيزنەستىڭ دامۋىنا بارىنشا جاعدايلاسۋ، ەلىمىزدىڭ ءار جەرىندە وسى زامانعى ينفەكتسيالىق اۋرۋحانالاردىڭ جەدەل سالىنۋى سياقتى ىستەر اتقارىلدى. جاڭا ينفەكتسيالىق اۋرۋحانا ءبىزدىڭ كوكشەتاۋ قالاسىندا دا وتە قىسقا مەرزىمدە سالىنىپ، ىسكە قوسىلدى. قاراعاندىدا ۆاكسينا شىعاراتىن زاۋىتتىڭ ىسكە قوسىلۋى دا يگى ءىستىڭ ءبىرى ەدى. جانە دە قازاقستاننىڭ ءوز ۆاكسيناسىن شىعارۋدى قولعا الۋى دا ەلىمىزدىڭ بۇل ىندەتتى جويۋعا بارىنشا جاۋاپتى قاراپ وتىرعاندىعى دەپ بىلەمىز»، - دەدى جابال ەرعاليەۆ. سونىمەن قاتار، ول حالىقتى كوروناۆيرۋس ينفەكتسياسىنا قارسى ۆاكسينا الۋدان قورىقپاۋعا شاقىردى.
«قازىر حالىقتى جاپپاي ۆاكسيناتسيالاۋ ءجۇرىپ جاتىر. وسى ۆاكسيناتسيا جايلى دە نەبىر داقپىرت تارالىپ جاتادى. قورىقپاڭىز! ادام بالاسىن ەرتەرەكتە شەشەك، بەزگەك، تاعى دا وزگە ىندەتتەردەن امان الىپ قالعان وسى ۆاكتسينا بولاتىن. ءوز باسىم ءبىرىنشى كەزەكتەگى ۆاكسينا الدىم. ەكىنشىسىن تاعى دا الامىن. قاۋىپتى ەشنارسە بايقاعان جوقپىن! سوندىقتان ەكپەدەن قورىقپاڭىزدار دەر ەدىم»، - دەدى ول.
