ۋاقىت تالابىن ەسكەرگەن سامميت

نۇر-سۇلتان. قازاقپارات - سارسەنبىنىڭ ساتىندە تۇركىتىلدەس مەملەكەتتەردىڭ ىنتىماقتاستىق كەڭەسىنە مۇشە مەملەكەتتەردىڭ باسشىلارى بەيرەسمي سامميتتە باس قوستى.

ونلاين فورماتتا وتكەن جيىن تۇركى الەمى مەن وركەنيەتىن جاڭعىرتىپ، دۇنيەجۇزى بەتپە- بەت كەلگەن سىن- قاتەرگە تولى كۇردەلى كەزەڭدە باۋىرلاس ەلدەردىڭ ىنتىماعىنا جاڭا دەڭگەيگە كوتەرۋگە باعىتتالدى.

«تۇركىستان - تۇركى الەمىنىڭ رۋحاني استاناسى» تاقىرىبىندا وتكەن كەزدەسۋگە قاتىستى ساراپشىلار مەن شەتەلدىك بۇقارالىق اقپارات قۇرالدارىنىڭ وي- پىكىرلەرىن ورتاعا سالامىز.

باۋىرلاس مەملەكەتتەردىڭ باسشىلارى ورتاق ماسەلەلەردى تالقىلاۋعا ۋاقىت تاپقانى كوڭىلگە قۋانىش ۇيالاتادى. اسىرەسە، كوروناداعدارىس پەن گەوساياسي، گەوەكونوميكالىق ماسەلەلەر تۋىنداپ تۇرعاندا بۇل وتە وزەكتى.

«Step by Step» تۇركى ينتەگراتسياسىنىڭ ءادىسى دە وسىمەن ەرەكشەلەنەدى. 1993 -جىلدىڭ باسىندا مادەني- گۋمانيتارلىق ىنتىماقتاستىق باعىتىندا تۇركسوي قۇرىلدى. سودان كەيىن 2008 -جىلى پارلامەنتشىلەر اراسىنداعى ىنتىماقتاستىق رەتىندە تۇركپا پايدا بولدى. 2009 -جىلى تۇركىتىلدەس مەملەكەتتەردىڭ ىنتىماقتاستىق كەڭەسى پايدا بولدى. سول جىلى عىلىمي ىنتىماقتاستىق باعىتىن دامىتۋ ماقساتىندا حالىقارالىق تۇركى اكادەمياسى قۇرىلدى. 2012 -جىلى تۇركى مادەنيەتى مەن مۇراسىنىڭ قورى قۇرىلدى. قازىر تۇركى كەڭىستىگىن ينستيتۋتسيالاۋدى ەكونوميكالىق جانە قارجىلىق باعىتتار تۇرعىسىنان دا دامىتىپ، جەتىلدىرۋ كەرەك.

ينستيتۋتتىق قۇرىلىمدار قۇرۋ جونىندەگى ۇسىنىس ۋاقىت تالابى. اتاپ ايتقاندا، قازاقستان پرەزيدەنتى ۇسىنعان تۇركىستاندا «ارنايى ەكونوميكالىق ايماق» قۇرۋ باستاماسى تۇركى ينۆەستيتسيالىق- ينتەگراتسيالىق قور قۇرۋدى تەزدەتەدى. سونداي- اق وزبەكستان پرەزيدەنتى شاۆكات ميرزيёيەۆتىڭ تۇركى مەملەكەتتەرى دامۋ بانكىن قۇرۋ جونىندەگى ۇسىنىسى مەملەكەتتەر باسشىلارىنىڭ كوزقاراستارى ۇقساس ەكەنىن كورسەتەدى. سونىمەن قاتار ازەربايجان پرەزيدەنتىنىڭ اتاپ وتكەن، بۇكىل تۇركى مەملەكەتتەرىن قامتيتىن جاڭا ترانزيت ءدالىزى دە ماڭىزعا يە.

داعدارىستان كەيىنگى جاڭا الەمدە تەك پراگماتيكتەر عانا مىقتى بولاتىنىن تۇسىنە وتىرىپ، تۇركىتىلدەس مەملەكەتتەر پرەزيدەنتتەرى تسيفرلاندىرۋ، ءبىلىم بەرۋ، لوگيستيكا، ساۋدا ماسەلەلەرىن وزەكتى ساناپ وتىر. ارينە، مادەنيەت، عىلىم جانە ونەر دە ۇمىتىلمايدى. پراگماتيزمدى يدەيالار قولداۋى كەرەك. «تۇركىستان دەكلاراتسياسى» قۇجاتىنىڭ اتاۋىندا قىپشاقتار، وعىزدار، قارلۇقتار، بارلىق تۇركى تايپاسى ءومىر سۇرگەن، باتىس جانە شىعىسپەن ىنتىماقتاس بولعان كونە تۇركىستان ولكەسى جاتىر. مۇندا كوپتەگەن زاماناۋي مادەنيەت ءۇشىن نەگىز بولعان قايتالانباس تۇركى قالالىق وركەنيەتى دۇنيەگە كەلدى.

اسقار ۋماروۆ، «قازاقپارات» ح ا ا ا ق باسقارما ءتوراعاسى