الماتىدا قانداي ساۋدا ۇيلەرىندە ەكپە سالۋ جۇمىسى جۇرگىزىلمەك

الماتى. قازاقپارات - الماتى قالالىق قوعامدىق دەنساۋلىق باسقارماسىنىڭ وكىلى، تەلەمەديتسينا ورتالىعىنىڭ باسشىسى لاۋرا مىرزاعالي ونلاين بريفينگ بارىسىندا قالاداعى قانداي ساۋدا ۇيلەردە ۆاكسينا سالۋ جۇمىسى جۇرگىزىلەتىنىن ايتتى، دەپ حابارلايدى قازاقپارات ءتىلشىسى.

«قازىر ءبىز الاتاۋ اۋدانىنداعى «باق وردا» ساۋدا ءۇيى، اۋەزوۆ اۋدانىندا «سپۋتنيك»، «گراند پارك»، «ماسكەۋ»، «الماتى مولل»، «ازيا پارك» ساۋدا ۇيلەرى، بوستاندىق اۋدانىندا «مەگا الماتى» ورتالىعى، «ادك» ساۋدا ءۇيى، «ەسەنتاي مولل»، «فورۋم»، «الماتى»، «اتاكەنت مولل» ساۋدا ۇيلەرىندە، جەتىسۋ اۋدانىندا «ماكسيما»، «ادەم»، «مەرەي» ساۋدا ۇيلەرى. ال مەدەۋ اۋدانىندا «دوستىق پلازا»، «گۋم» ساۋدا ۇيلەرى. تۇركسىب اۋدانىندا «ماك» جانە تاعى باسقا ساۋدا نۇكتەلەرىن قاراستىرىپ جاتىرمىز»، - دەدى ول.

قالادا جالپى 31 ساۋدا ۇيىندە ەكپە سالۋ جۇمىسى جۇرگىزىلمەك.

«ساۋىردە كوروناۆيرۋسقا قارسى جاپپاي ەكپە سالۋ باستالدى. الداعى ۋاقىتتا قالاعا ۇلكەن مولشەردە ۆاكسينا دوزاسى جەتكىزىلەدى. قازىر سوعان دايىندىق جۇمىستارى جۇرگىزىلىپ جاتىر. قازىر الماتى ەمحانالارى ەكپە سالۋ بويىنشا بازا جاساپ جاتىر، ياعني سوزىلمالى دەرت ەسەبىندە تۇرعان ادامداردىڭ ءتىزىمىن جانە كىمنىڭ ەكپەگە قارسى بەلگىلەرى بارىن انىقتاۋدا»، - دەدى لاۋرا مىرزاعالي.

اۆتور: الما مۇقانوۆا