وتباسىمدى ويلاعاندىقتان دا ۆاكسينا سالدىردىم - پوليتسەي

ورال. قازاقپارات - وتباسىمدى ويلاعاندىقتان دا ۆاكسينا سالدىردىم. بۇل تۋرالى ورال قالاسىندا تۇراتىن ۋچاسكەلىك پوليتسيا ينسپەكتورى، پوليتسيا مايورى ءالنۇر مۇحامەتياروۆ ءمالىم ەتتى، دەپ حابارلايدى قازاقپارات ءتىلشىسى.

ونىڭ ايتۋىنشا، بۇگىن №4-قالالىق ەمحانادا ۆاكتسينانىڭ ەكىنشى كومپونەنتىن قابىلداعان. ءبىرىنشى كومپونەنتىن سالدىرعان كەزدە دە دەنساۋلىعى قالىپتى بولعان. ءالنۇر بوكەنباي ۇلى ءوزىن جاقسى سەزىنەتىنىن جەتكىزدى. ول م. وتەمىسوۆ اتىنداعى باتىس قازاقستان ۋنيۆەرسيتەتىن زاڭگەرلىك ماماندىعى بويىنشا بىتىرگەننەن كەيىن 2008 -جىلدان بەرى وسى سالادا قىزمەت اتقارىپ كەلەدى ەكەن. قازىر «قۇرىلىسشى» شاعىناۋدانىنداعى №15-ۋچاسكەلىك پۋنكتتە.

«ءبىزدىڭ جۇمىسىمىز حالىقپەن بايلانىستى. قىزمەت بابىنا بايلانىستى ءتۇرلى جەرلەرگە بارىپ، ادامدارمەن جولىعۋعا تۋرا كەلەدى. سوندىقتان ىندەت جۇقتىرماۋ ءۇشىن وسىنداي قادامعا باردىم. ونىڭ ۇستىنە وتباسىمدا اتا-انام بىرگە تۇرادى. زايىبىم، ءۇش بالام بار. ولاردىڭ دا دەنساۋلىعىن ويلاۋ كەرەك. شىنى كەرەك، الەۋمەتتىك جەلى ارقىلى ۆاكتسيناتسياعا قاتىستى نەشە ءتۇرلى الىپقاشتى اڭگىمە كەلىپ جاتىر. مەن وعان سەنبەيمىن. ەكپە سالۋ ەڭ الدىمەن ءوزىڭ جانە وتباسىڭ ءقاۋىپسىز بولۋى ءۇشىن قاجەت دەپ ويلايمىن»، دەدى قازاقپارات تىلشىسىنە ءا. مۇحامەتياروۆ.

ەسكە سالا كەتەيىك، بۇدان بۇرىن باتىس قازاقستاندا 3 مىڭنان استام مەدقىزمەتكەردىڭ كوروناۆيرۋس ەكپەسىن سالدىرعانىن، سوڭعى اپتادا ىندەت جۇقتىرۋ دەڭگەيى 20,5 پايىزعا وسكەنىن جازعان بولاتىنبىز.