بەلسەندىلەر ۇلكەن الماتى وزەنىنىڭ جاعالاۋىنداعى قۇرىلىسقا شاعىمداندى - فوتو

قالالىق اكىمدىك بۇل جاعدايعا قاتىستى تۇسىنىكتەمە بەردى، دەپ حابارلايدى قازاقپارات ءتىلشىسى. «الماتى قالاسىنىڭ ەكولوگيالىق قوعامى» توبىنىڭ Facebook پاراقشاسىنا بەلسەندىلەر مەردىگەر كومپانيا ساتپايەۆ كوشەسى مەن اباي داڭعىلى ارالىعىن، ياعني ۇلكەن الماتى وزەنىنىڭ جاعالاۋىنداعى جاسىل ايماقتى زاڭسىز قورشاپ الدى دەپ جازدى. ولار جاقىندا اعاشتار كەسىلۋى مۇمكىن دەپ بولجادى.

قالا قۇرىلىسىن باقىلاۋ باسقارماسىنىڭ باسپا ءسوز قىزمەتى اتاپ وتكەندەي، الماتى قالاسىنىڭ مەملەكەتتىك جەر كاداسترىنىڭ اۆتوماتتاندىرىلعان جۇيەسىنىڭ دەرەكتەرى بويىنشا اۋەزوۆ اۋدانى، ساتبايەۆ كوشەسى №145ا، وندىرىستىك عيماراتقا قىزمەت كورسەتۋ ءۇشىن ۋاقىتشا وتەۋلى جەر پايدالانۋ قۇقىعى نەگىزىندە بەرىلگەن.

بۇل ۋچاسكەدەگى تۇرعىن ەمەس ءۇي- جايلار (گاراجدار، شەبەرحانالار) 2007 -جىلعى 1-تامىزداعى لەگاليزاتسيا كوميسسياسىنىڭ شەشىمىمەن زاڭداستىرىلعان. قازىرگى ۋاقىتتا ءىشىنارا بۇزىلدى جانە قايتا قۇرۋ مەن سالۋ بويىنشا جۇمىستار باستالدى.

«اتالعان مەكەنجايدا ءۇي-جايلاردى قايتا قۇرۋ جانە سالۋ بويىنشا قۇرىلىس-مونتاجداۋ جۇمىستارىنىڭ باستالعانى تۋرالى حابارلاما تۇسكەن جوق، جۇمىس توقتاتىلدى. سونداي-اق، مەنشىك يەسى نەگىزگى جەر ۋچاسكەسىنىڭ شىعىس جاعىنداعى مەملەكەتتىك جەردى ءىشنارا قورشاپ العان. ءتۇسىندىرۋ جۇمىستارىنىڭ ناتيجەلەرى بويىنشا بۇل مەنشىك يەسى مۇمكىندىگىنشە تەزىرەك جەكە باسىن كۋالاندىراتىن قۇجاتتا كورسەتىلگەن شەكارالارعا سايكەس قورشاۋدى جىلجىتۋ تۋرالى مىندەتتەمە الدى. سونداي-اق، اعاشتاردى كەسۋ جوسپاردا جوق. كەرىسىنشە، سانيتارلىق كەسۋ جۇمىستارى جەرگىلىكتى اتقارۋشى ورگاندار قىزمەتكەرلەرىنىڭ قاتىسۋىمەن 2020 -جىلدىڭ قاراشا ايىندا جۇرگىزىلگەن» دەپ حابارلادى باسقارمادان.

اۆتور: الما مۇقانوۆا