بەرمۋد ءۇشبۇرىشىنا قاتىستى تاعى ءبىر سىر اشىلدى

نۇر-سۇلتان. قازاقپارات - بەرمۋد ءۇشبۇرىشى - جەر شارىنىڭ سىرلى نۇكتەلەرىنىڭ ءبىرى. بۇل جەردەن ۇشاتىن، جۇزەتىن سۋ جانە اۋە كەمەلەرى جۇمباق تۇردە جوعالىپ كەتەتىندىكتەن ادامدار بەرمۋد ءۇشبۇرىشىنداعى اپاتتاردى ءارتۇرلى تابيعي قۇبىلىستارمەن، جاتپلانەتالىقتارمەن بايلانىستىرادى.

جاقىندا عالىمدار تاعى ءبىر قىزىق مالىمەتتىڭ شەتىن شىعاردى.

زەرتتەۋشىلەر ءار جىلداعى مالىمەتتەردى سالىستىرا وتىرىپ بەرمۋد ءۇشبۇرىشى ايماعىندا ورنالاسقان سارگاسسو تەڭىزىندەگى داۋىلدار ءار ون جىل سايىن كۇشەيە تۇسكەنىن انىقتادى.

داۋىلدىڭ ورتاشا جىلدامدىعى بەرمۋد ۇشبۇرىشىنداعى 100 شاقىرىم راديۋستا 1955-2019-جىلدار ارالىعىندا ساعاتىنا 56 دان 117 شاقىرىمعا دەيىن وسكەن. ياعني ون جىل سايىن جەلدىڭ جىلدامدىعى ساعاتىنا 10 شاقىرىمعا ارتىپ وتىرعان.

اتلانت مۇحيتى، سارگاسسو تەڭىزىندە ورنالاسقان بۇل ايماق فلوريدا، بەرمۋد، پۋەرتو-ريكو ارالدارىمەن قورشالعان ءۇشبۇرىشتا ورنالاسقاندىقتان وسىلاي اتالادى

وزگەرىستەر جاھاندىق جىلىنۋعا بايلانىستى. تەڭىز بەتىنىڭ جوعارى تەمپەراتۋراسى ودان دا كۇشتى تروپيكالىق تسيكلوندار تۋۋىنا سەپ بولادى. سونىمەن قاتار بۇعان دەيىن بۇل وتە ماڭىزدى ءرول اتقارمايدى دەپ ەسەپتەلگەنىمەن، داۋىلدىڭ پايدا بولۋىنا تەڭىز تۇبىندەگى تەمپەراتۋرا دا اسەر ەتەدى.

تروپيكالىق تسيكلوندار جىلى جانە ىلعال اۋا كوتەرىلگەندە پايدا بولادى، سۋ بۋى جاڭبىر تۇرىندە كوندەنساتسيالانادى جانە پروتسەستەن الىنعان قۇرعاق اۋا تومەندەيدى. ناتيجەسىندە جەر ءۇستى سۋى سالقىندايدى، ءبىراق تەڭىز تۇبىندەگى سۋ جىلى بولسا، ول كوتەرىلىپ، داۋىل تۇرادى. «ناتيجەسىندە كۇن رايى ىسىعان سايىن داۋىل دا كۇشەيە تۇسەدى»، - دەيدى عالىمدار.

ايتا كەتەيىك، 2018-جىلى ۇلى بريتانياداعى ساۋتگەمپتون ۋنيۆەرسيتەتىنىڭ زەرتتەۋشىلەر توبى بەرمۋد ءۇشبۇرىشىنىڭ اينالاسىنداعى قاۋەسەتتەردىڭ عىلىمي نەگىزىن تابۋ ءۇشىن زەرتتەۋ جۇرگىزەدى.

زەرتتەۋگە سايكەس، بۇل ايماقتا كەمەلەردىڭ جوعالىپ كەتۋىنە تولقىندار سەبەپ بولعان.

بەرمۋد ۇشبۇرىشىندا 30 مەتر بيىكتىككە جەتەتىن وتە تىك تولقىنداردىڭ بولاتىنى بەلگىلى. تولقىندار كۇشتى داۋىلدىڭ ءبىر ۋاقىتتا بىرنەشە نۇكتەدە قوزعالۋى ناتيجەسىندە پايدا بولادى.

massaget.kz