اتىراۋدىڭ جاپپاي كارانتينگە جابىلاتىنى جايلى اقپارات جالعان - اكىمدىك

اتىراۋ. قازاقپارات - اتىراۋدا قالانىڭ جاپپاي كارانتينگە جابىلاتىنى تۋرالى اقپارات وتىرىك بولىپ شىقتى، دەپ حابارلايدى قازاقپارات ءتىلشىسى.

«WhatsApp مەسسەندجەرىندە اتىراۋ قالاسىنىڭ 2- ساۋىردەن باستاپ جاپپاي كارانتينگە جابىلاتىنى تۋرالى جاڭالىقتىڭ سكرينشوتى تاراپ جاتىر. حابارلامادا قالادان شىعار جولعا بلوكپوستار قويىلىپ، 1- ءساۋىردىڭ ءتۇن جارىمىنا دەيىن قالادان شىعىپ-كىرىپ الۋ كەرەكتىگى جازىلعان. حابارلاما شىندىققا جاناسپايدى. بۇل - 2020-جىلى جاريالانعان جاڭالىقتىڭ سكرينشوتى. قازىر قالا اينالاسىندا بلوكپوستار جوق، شىعۋ جانە كىرۋ جولدارى اشىق» دەپ حابارلادى اتىراۋ وبلىسىنىڭ اكىمشىلىگىنەن.

ەسكە سالا كەتەيىك، سوڭعى تاۋلىكتە اتىراۋ وبلىسىندا ك ۆ ي- دىڭ 75 جاعدايى انىقتالعان.

قوعامدىق دەنساۋلىق ساقتاۋ ۇلتتىق ورتالىعىنىڭ دەرەكتەرىنە ساي، اتىراۋ وبلىسى - COVID-19-دىڭ تارالۋ دەڭگەيى بويىنشا «قىزىل» ايماقتا.