تۇركى كەڭەسى ەلدەرىنىڭ دامۋ بانكىن قۇراتىن كەز كەلدى - شاۆكات ميرزيەيەۆ
بۇل تۋرالى تۇركى تىلدەس مەملەكەتتەردىڭ ىنتىماقتاستىق كەڭەسىنىڭ بەيرەسمي ءسامميتى بارىسىندا وزبەكستان پرەزيدەنتى شاۆكات ميرزيەيەۆ ايتتى، دەپ حابارلايدى قازاقپارات ءتىلشىسى.
«دامۋدىڭ جاڭا داۋىرىندە ءبىز كەز كەلگەن سىن- تەگەۋرىنگە دايىن بولۋىمىز، الەۋەتىمىزدى بىرلەسە وتىرىپ قولدانۋىمىز كەرەك. سونىمەن قاتار وسى جىلداردىڭ ىشىندەگى باستى ماقساتىمىز ەكونوميكالىق قارىم- قاتىناسىمىزدى نىعايتۋ بولدى. دەگەنمەن ول ناقتى قۇجاتتارعا نەگىزدەلۋى ءتيىس»، - دەدى وزبەكستان پرەزيدەنتى.
سونىمەن قاتار ول تۇركى كەڭەسىنىڭ ينۆەستيتسيالىق قورىن قۇرۋ قاجەتتىگىن اتاپ ءوتتى.
«تۇركى كەڭەسى ءوزىنىڭ ينۆەستيتسيالىق قورىن جاساقتاپ، دامۋ بانكىن اشاتىن ۋاقىت كەلدى. وسىعان قاتىستى ناقتى جۇمىستاردى باستاۋعا دايىنبىز. مۇنان بولەك، كولىك- ترانزيت الەۋەتىمىزدى دامىتۋدىڭ ماڭىزدىلىعى ارتىپ كەلەدى. وعان ءوڭىرىمىزدىڭ بارلىق مۇمكىندىگى دە، الەۋەتى دە بار. ياعني، ورتالىق ازيا ارقىلى قىتاي، ءۇندىستان، پاكىستان سىندى الەمدىك نارىققا شىعار جول اشۋىمىز قاجەت. ال ازەربايجان مەن تۇركيا ارقىلى ەۋروپا ەلدەرىنە شىعا الار ەدىك. ال بۇل ينفراقۇرىلىمدىق جوبالاردى قاجەت ەتەدى»، - دەدى شاۆكات ميرزيەيەۆ.
