نۇر-سۇلتاندا قانشا جەتىم بالا باسپانامەن قامتاماسىز ەتىلگەن
شىمكەنت پەن ش ق و- دا جەتىم بالالاردىڭ %50 دان استامى تۇرعىن ۇيمەن قامتاماسىز ەتىلگەن. بۇل تۋرالى نۇر-سۇلتان قالاسى ءماسليحاتىنىڭ كەزەكتى سەسسياسىندا ايتىلدى، دەپ حابارلايدى قازاقپارات ءتىلشىسى.
«تۇرعىن ءۇي باسقارماسىنىڭ مالىمەتىنشە، 599 تۇرعىن ءۇيدىڭ 121 ى جەتىم بالالارعا بەرىلگەن. زاڭ تۇرعىسىندا الىپ قاراعاندا وتە دۇرىس، ءبىراق جەتىم بالالارعا ادامي تۇرعىدا الىپ قاراعاندا ەسەپتەۋدى 2271 دەن باستاۋ كەرەك. ويتكەنى قازىر ەلورداداعى جەتىم بالالارىڭ باسپانامەن قامتاماسىز ەتىلۋى %4 عانا. بۇل كورسەتكىشتى تىم بولماعاندا %15 عا جەتكىزسەك جاقسى بولار ەدى. بۇل ماسەلە باسقا وڭىرلەردە قالاي شەشىلىپ جاتقانىن زەرتتەپ كوردىك. شىمكەنت پەن ش ق و- دا جەتىم بالالاردىڭ %50 دان استامى باسپانامەن قامتاماسىز ەتىلگەن. ول ءۇشىن اكىمدىك تاراپىنان ارنايى كەشەندى جوسپار قۇرىلعان. بۇل جۇمىسقا بارلىق مەملەكەتتىك قۇزىرلى ورگاندار جۇمىلدىرىلعان»، - دەيدى نۇر-سۇلتان قالاسى ءماسليحاتىنىڭ دەپۋتاتى ءلاززات رازبەكوۆا- تىلەۋحانوۆا.
ونىڭ ايتۋىنشا، كوپتەگەن مەكەمە الدەبىر ماسەلەگە قاتىستى سۇراق قويىلعاندا ول ماسەلە ولاردىڭ قۇزىرىندا ەمەس ەكەندىگىن ايتادى.
«مەكەمەلەر بۇل ماسەلەنى شەشۋدى ءبىر-بىرىنە سىلتەيتىندىكتەن، جەتىمدەر ماسەلەسى سول كۇيىندە شەشىلمەي قالىپ وتىر. وسى ورايدا بارلىق مەكەمە بىرلەسە جۇمىس ىستەسە، نۇر ۇستىنە نۇر بولار ەدى. نۇر-سۇلتان قالاسىنىڭ ءبىلىم باسقارماسى، جاستار ساياساتى باسقارماسى، تۇرعىن ءۇي باسقارماسى بىرىگىپ كەشەندى جوسپار قۇرۋى قاجەت جانە جۇيەلى تۇردە ارەكەت ەتۋى كەرەك دەگەن ۇسىنىس ايتقىم كەلەدى»، - دەيدى ول.
اۆتور: زارينا قاھارمان
