ءتورت جاسار جەتىم بالانى مۇگەدەكتەر ورتالىعىنا وتكىزە سالۋعا بولمايدى - دەپۋتات
بۇل بالا پسيحولوگياسىنا كەرى اسەر ەتەدى. بۇل تۋرالى نۇر-سۇلتان قالاسى ءماسليحاتىنىڭ كەزەكتى سەسسياسىندا ايتىلدى، دەپ حابارلايدى قازاقپارات ءتىلشىسى.
«ومىرلىك قيىن جاعدايعا تاپ بولعان بالالاردىڭ قالىپتاسۋىنا ايتارلىقتاي نۇقسان كەلتىىرپ وتىرعان تاعى ءبىر فاكتور بار. مىسالى، تاستاندى بالا پەرزەنتحانادان ارنايى بالالار ۇيىنە اكەلىنەدى. جاڭا تۋعان ءسابيدىڭ كوزىن اشا سالىپ كورەتىنى - تاربيەشى. ول تاربيەشىنى اناسىنداي قابىلدايدى، باسقاشا بولۋى مۇمكىن ەمەس. ارنايى بالالار ءۇيى - ءسابيدىڭ وتباسى بولىپ سانالادى. ال ءبىز سول ءسابي 4 جاسقا تولعان كەزدە جەتىمدەر ۇيىنە نەمەسە مۇگەدەكتەرگە ارنالعان ارنايى ورتالىققا بەرەمىز. مامان رەتىندە ايتارىم، بالانىڭ 1-6 جاس ارالىعىنداعى ءومىرى بالانىڭ بولاشاق ومىرىنە ازىق بولادى. بالا ءومىرىنىڭ نەگىزگى ىرگەتاسى وسى كەزەڭدە قالانادى»، - دەيدى نۇر-سۇلتان قالاسى ءماسليحاتىنىڭ دەپۋتاتى ءلاززات رازبەكوۆا- تىلەۋحانوۆا. ول بالانى 4 جاستان باستاپ باسقا ورتاعا الىپ بارۋدىڭ زيانى تۋرالى ايتتى.
«بىرىنشىدەن، بالاعا پسيحولوگيالىق تۇرعىدا زيان كەلتىرەمىز. ەكىنشىدەن، ارنايى بالالار ۇيىندە كوبىنە اعايىندىلار بولادى. مىسالى، بىرەۋى 4 جاستا بولسا، ەكىنشىسى 5 جاستا. سوندا اعايىندى ەكى بالانى 4 جاسقا تولعاننان كەيىن ەكى جاققا بولەمىز. ال مۇمكىندىگى شەكتەۋلى بالالارعا كەلەتىن بولساق، جاعداي تىپتەن مۇشكىل. ارنايى بالالار ۇيىندە مۇگەدەك بالا قاسىنداعى ساۋ بالالارمەن بىرگە وسەدى. ولارعا قاراپ ەلىكتەپ وسەدى. ال ءبىز ول مۇگەدەك بالانى جاقسى ورتادان الىپ، مۇگەدەكتەرگە ارنالعان ورتاعا تىعا سالامىز. وسىلايشا ءبىز ق ر مۇگەدەك تۋرالى زاڭىنىڭ 14-بابى، 1-تارماعى جانە ق ر ءبىلىم تۋرالى زاڭىنىڭ تارماقتارىنىڭ بۇزىلۋىنا جول بەرىپ وتىرمىز. وسى ماسەلەنى شەشۋ ءۇشىن ارنايى بالالار ۇيىندە ءسابي 6 جاسقا دەيىن بولۋى ءۇشىن بيۋدجەتتەن قوسىمشا 32386000 قاراجات ءبولۋدى قاراستىرۋدى سۇرايمىز»، - دەيدى ول.
اۆتور: زارينا قاھارمان
