استانادا قيىن جاعدايعا تاپ بولعان قىزدارعا ارنالعان ورتالىق اشۋ كەرەك - دەپۋتات

ونىڭ %60 - قىز بالالار. بۇل تۋرالى نۇر-سۇلتان قالاسى ءماسليحاتىنىڭ كەزەكتى سەسسياسىندا ايتىلدى، دەپ حابارلايدى قازاقپارات ءتىلشىسى.

«بۇگىنگى تاڭدا بۇكىل الەم ەكونوميكالىق داعدارىستى باستان كەشىرۋدە. ارينە، نۇر-سۇلتان قالاسى بۇدان شەت قالا المايدى. حالىقتىڭ الەۋمەتتىك ماسەلەلەرى قانشالىقتى كۇردەلى بولسا، سول ماسەلەلەردىڭ ءبىر ۇشى مىندەتتى تۇردە جەتىم بالالار مەن اتا-انا قامقورلىعىنسىز قالعان بالالارعا كەلىپ تيەدى. ماسەلەن، نۇر-سۇلتان قالاسى اكىمدىگىنىڭ جانىندا ومىرلىك قيىن جاعدايعا تاپ بولعان بالالاردى قولداۋ ورتالىعى بار. وتكەن جىلدىڭ مالىمەتى بويىنشا، سول ورتالىققا 35 بالا تىركەلسە، بيىل 3 ايدىڭ ىشىندە سول بالالاردىڭ سانى 68 گە جەتىپ وتىر»، - دەيدى نۇر-سۇلتان قالاسى ءماسليحاتىنىڭ دەپۋتاتى ءلاززات رازبەكوۆا- تىلەۋحانوۆا.

ونىڭ ايتۋىنشا، ومىرلىك قيىن جاعدايعا تاپ بولعان 68 بالانىڭ %60 - قىزدار.

«بۇل - جۇرەكتى اۋىرتاتىن ماسەلە. وسىعان وراي ءبىلىم باسقارماسىنا 12-18 جاس ارالىعىنداعى قىزدارعا ارنالعان ارنايى ورتالىق اشۋدى جانە وسى ماسەلەنى شەشۋگە قاتىستى ۇسىنىستار دايىنداۋدى تاپسىرۋ قاجەت دەپ سانايمىن»، - دەيدى ول.

اۆتور: زارينا قاھارمان