ماسكەۋ ماڭىنداعى كوتتەدج قالاشىعىندا اتىس بولدى
كۇدىكتىنىڭ ءۇيىن تەكسەرۋ بارىسىندا ول ۇيىنە جاسىرىنىپ الىپ، قۇقىق قورعاۋ قىزمەتكەرلەرىنە قاراتا وق اتقان، دەپ حابارلايدى قازاقپارات رەسەيلىك تاسس اگەنتتىگىنە سىلتەمە جاساپ.
قۇقىق قورعاۋ ورگاندارىنداعى دەرەككوزدىڭ مالىمەتتەرىنە قاراعاندا، كۇدىكتى 1960-جىلى تۋعان كوتەرمە-بولشەك ساۋدا جانە قۇرىلىس فيرماسىنىڭ باس ديرەكتورى - ۆلاديمير باردانوۆ.
پوليتسيا قىزمەتكەرلەرى كۇدىكتىنىڭ ايەلىنە تۇرعىن ءۇيدى ءتىنتۋ جونىندەگى سوت شەشىمىن كورسەتىپ، ءۇيدىڭ اۋلاسىنا كىرگەن.
باردانوۆ وسى ۋاقىتتا ءۇيدىڭ تەرەزەسىنەن اۆتوماتتان وق اتىپ، گراناتا لاقتىرا باستاعان. ەر ادام قۇقىق قورعاۋشىلارعا قاراي بارلىعى 20 گراناتا لاقتىرعان. ول جارىلىس جاساپ، پوليتسياعا تەگەۋرىندى قارسىلىق كورسەتكەن.
سونىڭ سالدارىنان ۇيدەن ءورت شىققان. ارادا ءبىرشاما ۋاقىت وتكەن سوڭ تاعى دا جارىلىس بولعان. روسگۆارديانىڭ ارنايى ماقساتتاعى ساربازدارى ۇيگە شابۋىلداۋ بارىسىندا گراناتا اتقىش قولدانعان.
باردانوۆقا قاتىستى بىرنەشە ءوندىرىس جۇرگىزىلگەن. ونىڭ ىشىندە 148 ميلليون رۋبل سالىق بەرەشەگى بار. اتىس باستالعاندا ۇيدە 1 ءسابي مەن 3 ەرەسەك ادام بولعان. ولاردىڭ بارلىعى دا باردانوۆتىڭ تۋىستارى.
ەرەسەك ادامدار مەن ءسابي ۇيدەن شىققان، 1 ادام عانا قالعان. وقيعانىڭ كۋاگەرى قۇقىق قورعاۋشىلارعا وق اتقان ادامنىڭ ساياجايىندا جولبارىس، ايۋ، سىلەۋسىن سياقتى جابايى اڭدار ۇستايتىنىن ايتقان.
تاسس اگەنتتىگىنە سۇحبات بەرگەن ازامات كۇدىكتىنىڭ بۇل ءۇيدىڭ وسىدان 10-15 جىل بۇرىن سالعانىن، الايدا كورشىلەرىمەن قاتىناسپايتىنىن ايتقان. تەرگەۋ كوميتەتى فەدەرالدى قاۋىپسىزدىك قىزمەتى مەن ىشكى ىستەر ورگاندارىنا وق اتۋ ارەكەتى بويىنشا قىلمىستىق ءىس قوزعادى.
كۇدىكتى ءومىر بويىنا باس بوستاندىعىنان ايىرىلۋى مۇمكىن.
