22:45, 30 - ناۋرىز 2021 | GMT +5
اقتوبەنىڭ باس دارىگەرى: بالالار اپەلسيننەن جاپپاي ۋلانىپ جاتقانى جايلى اقپارات جالعان
اقتوبە. قازاقپارات - اقتوبەدە WhatsApp جەلىسى ارقىلى «اپەلسيننەن ۋلاندى» دەگەن اقپارات تاراپ كەتتى.
وبلىستىق دەنساۋلىق ساقتاۋ باسقارماسىنىڭ باسشىسى رۇستەم يسايەۆ اقپاراتقا قاتىستى تۇسىنىك بەردى، دەپ حابارلايدى قازاقپارات ءتىلشىسى.
الەۋمەتتىك جەلى ارقىلى بەيتانىس ادامنىڭ: «ماندارين، اپەلسين جەمەڭدەر. اقتوبەدە ماندارين، اپەلسيننەن بالالار ءولىپ جاتىر» دەگەنى جازىلعان حابار كەلدى.
«بالالاردىڭ اۋىز قۋىسى ۋىلىپ، جارا بولىپ، ينفەكتسيالىق اۋرۋحانانىڭ ءىشى ناۋقاسقا تولدى» دەگەن حابارلاما كوپشىلىككە تاراپ كەتتى. بۇل حابارلاماداعى اقپاراتتى وبلىستىق دەنساۋلىق ساقتاۋ باسقارماسىنىڭ باسشىسى رۇستەم يسايەۆ جوققا شىعاردى.
«بالالاردى ەمدەيتىن ەكى اۋرۋحاناعا حابارلاسىپ، جاعدايدى ءبىلدىم. جاپپاي ۋلانىپ، ەم ىزدەپ كەلگەن بالا جوق. بۇل جالعان اقپارات»، - دەدى ر. يسايەۆ.
