د د ۇ كوروناۆيرۋستىڭ پايدا بولۋىن انىقتاۋ ءۇشىن قىتايعا جاساعان ساپارىنىڭ قورىتىندىسىن جاريالادى
جەنەۆا. قازاقپارات – د د ۇ ساراپشىلارى قىتايدىڭ ۋحان قالاسىنا جاسالعان ساپاردان كەيىن جاڭا تيپتەگى كوروناۆيرۋس زەرتحانادان تاراعان دەگەن نۇسقا كۇماندى دەگەن قورىتىندىعا كەلدى.
مۇنداي قورىتىندى سەيسەنبى كۇنى د د ۇ سايتىندا جاريالانعان باياندامادا جازىلعان، دەپ حابارلايدى قازاقپارات.
«زەرتحانالىق جاعداي ناتيجەسىندە ادامعا اۋىسۋى ەكىتالاي بولىپ كورىنەدى»،- دەلىنگەن باياندامادا.
وندا «ارالىق تاسىمالداۋشى» ارقىلى ۆيرۋستىڭ ادامدارعا بەرىلۋى «وتە ىقتيمال» دەپ كورسەتىلگەن.
قۇجاتتا سونىمەن قاتار جارعاناتتار COVID-19 دىڭ العاشقى تاسىمالداۋشىسى بولۋى مۇمكىن، سودان كەيىن ۆيرۋس باسقا جانۋارلاردىڭ اعزاسىندا مۋتاتسياعا ۇشىراۋى مۇمكىن ەكەنى ايتىلعان.
