الماتىدا وقۋشىلار ءتورتىنشى توقساندى قاشىقتان وقىپ باستايدى

الماتى. قازاقپارات - الماتى مەكتەپتەرى قايتادان قاشىقتان ءبىلىم بەرۋگە كوشەدى.

بۇل تۋرالى ونلاين بريفينگ بارىسىندا الماتى قالاسىنىڭ باس مەملەكەتتىك سانيتار دارىگەرى جانداربەك بەكشين ءمالىم ەتتى، دەپ حابارلايدى قازاقپارات ءتىلشىسى.

ونىڭ ايتۋىنشا، مەكتەپ پەن بالاباقشاداعى بالالار اراسىندا ۆيرۋس جۇقتىرۋ جاعدايى كۇرت وسكەن. «بيىل مەكتەپكە دەيىنگى بالالار اراسىندا ۆيرۋس جۇقتىرۋ ەكى ەسە كوبەيدى، وعان قوسا وقۋشىلاردىڭ دا ىندەت جۇقتىرۋى جوعارى. مۋتاتسيادان وتكەن شتامدار كىشكەنتاي بالالارعا دا اسەرىن تيگىزۋدە. بىلتىر 281 وقۋشى اۋىرسا، بيىلعى جىلدىڭ ءۇش ايىندا 1468 بالا ۆيرۋس جۇقتىرعان. سول سەبەپتى وسى جولى قاتاڭ شەكتەۋ شارالارىن ەنگىزدىك»، - دەيدى جانداربەك بەكشين.

سونداي-اق ول قالاداعى بارلىق مەكتەپتەر قاشىقتان ءبىلىم بەرۋگە كوشەتىنىن، تەك كەزەكشى توپتاردا عانا ءداستۇرلى فورماتتى ءبىلىم الاتىنىن ايتتى.

«اتا- انالاردىڭ ءوتىنىشى بويىنشا كەزەكشى توپتار اشىلادى. ونداعى وقۋشىلار سانى 15 بالادان اسپاۋى قاجەت. بۇل 1-5-سىنىپتار جانە حالىقارالىق دەڭگەيدە وقيتىن مەكتەپتەردەگى 1-7-سىنىپتارعا قاتىستى. سونىمەن قاتار، مەكتەپتى بىتىرەتىن 9 بەن 11 (12)-سىنىپتاردا دا كەزەكتى توپ اشىلادى»، - دەدى ول.

اۆتور: الما مۇقانوۆا