پرەزيدەنت تاپسىرماسى: ايەلدەر مەن بالالاردى زورلىق-زومبىلىقتان قورعايتىن پوليتسەيلەر سانى ارتتى

نۇر-سۇلتان. قازاقپارات - ق ر ىشكى ىستەر مينيسترلىگى ىشكى ىستەر ورگاندارىنىڭ ايەلدەر مەن بالالاردى زورلىق- زومبىلىقتان قورعاۋ بولىمشەلەرىنىڭ شتات سانىن ۇلعايتتى.

بۇل جايىندا ق ر پرەزيدەنتىنىڭ كومەكشىسى ەرلان قارين Telegram پاراقشاسىندا جازدى، دەپ حابارلايدى قازاقپارات ءتىلشىسى.

«وسى جىلدىڭ 25-اقپانىندا وتكەن ۇلتتىق قوعامدىق سەنىم كەڭەسىنىڭ V وتىرىسىندا ق ر پرەزيدەنتى قاسىم-جومارت توقايەۆ ىشكى ىستەر ورگاندارىنىڭ ايەلدەر مەن بالالاردى زورلىق- زومبىلىقتان قورعاۋ جونىندەگى بولىمشەلەرىنىڭ شتاتىن قالپىنا كەلتىرۋ جانە قىزمەتىن ودان ارى كۇشەيتۋ تۋرالى تاپسىرما بەرگەن بولاتىن. بۇل بولىمشە ءىىم قۇرىلىمىندا سوناۋ 1999 -جىلى اشىلعان ەدى. ءبىراق، كەيىن ونىڭ شتات سانى، اسىرەسە، بۇل سالادا قۇقىق بۇزۋشىلىق بارىنشا جوعارى بولىپ وتىرعان وڭىرلەردە ەكى ەسەگە جۋىق قىسقارعان»، - دەيدى ەرلان قارين.

پرەزيدەنت كومەكشىسىنىڭ اتاپ وتۋىنشە، بۇل ماسەلەنى ۇلتتىق كەڭەس مۇشەسى، تانىمال قازاقستاندىق ساراپشى گۇلميرا يلەۋوۆا كوتەرگەن.

«2021 -جىلدىڭ 19-ناۋرىزىندا ىشكى ىستەر ءمينيسترىنىڭ بۇيرىعىمەن ايەلدەر مەن بالالاردى زورلىق- زومبىلىقتان قورعاۋ بولىمشەلەرىنىڭ شتات سانى ۇلعايتىلدى. بۇل شەشىم شتاتتىق بىرلىكتەردى ىشكى ءبولۋ ەسەبىنەن جۇزەگە اسىرىلدى. اتاپ ايتقاندا، ايەلدەر مەن بالالاردى زورلىق- زومبىلىقتان قورعاۋ بولىمشەلەرىنىڭ شتات سانى 129 عا ۇلعايدى. ءوز كەزەگىندە، كامەلەتكە تولماعاندار ءىسى جانە بالالاردى قورعاۋ بولىمشەلەرىنىڭ سانى ەكى ەسەگە جۋىق - 448 بىرلىككە كەڭەيتىلدى»، - دەدى ول.

اۆتور: مارلان جيەمباي