«ءال- فارابي» انيماتسيالىق تەلەحيكاياسى جارىققا شىقتى
2D فورماتتا جاسالعان تانىمدىق جوبانىڭ ءار ءبولىمى 8 مينۋتتان تۇرادى. تەلەحيكايانىڭ باستى ماقساتى - تۇركى ەلىنەن شىققان ءابۋ ناسىر ءال- فارابيدىڭ تاعىلىمدى ءومىر جولىن بايانداۋ ارقىلى ەلىمىزدىڭ بۇلدىرشىندەرى مەن جاستارىن عىلىم- بىلىمگە باۋلۋ.
«ۇسىنىپ وتىرعان جوبامىزدىڭ تاريح پەن بولاشاق اراسىنداعى التىن كوپىر بولارىنا نىق سەنىمدىمىز. سەبەبى، ءابۋ ناسىر ءال- فارابي - الەمدىك عىلىم مەن ءبىلىم تاريحىنداعى ۇلى تۇلعا. وسىناۋ تەڭدەسسىز عالىمنىڭ ءومىرى مەن عىلىمي ىزدەنىستەرى جايىندا تۇشىمدى دۇنيە جاساۋدى باستى مىندەتىمىز دەپ بىلەمىز. جوبادا ءال- ءفارابيدىڭ عىلىمي جەتىستىكتەرگە وقۋ، ىزدەنىس، ەڭبەك پەن دانالىقتىڭ ارقاسىندا جەتكەنى باياندالادى. مۇنداي كوركەمدىك، كونتسەپتۋالدى شەشىم ەكران الدىنداعى بۇلدىرشىندەردىڭ ىزدەنىسكە، ەڭبەك پەن وقۋعا بەت بۇرۋىنا سەبەپكەر بولا الادى دەگەن ويدامىز»، - دەيدى ارنا ديرەكتورى ماقپال جۇماباي.
انيماتسيالىق تەلەحيكايا الەمدىك وركەنيەت پەن مادەنيەتتىڭ وشاعى بولعان ەجەلگى تيكال، افينا، باعدات، كاير، شاڭان، فاراب قالالارىن تانىستىرۋدان باستالادى.
«ءال- فارابي» انيماتسيالىق جوباسى «Balapan» تەلەارناسىنان دۇيسەنبى- جۇما كۇندەرى، ساعات 20:10, 23:00-دە كورسەتىلەدى. تەلەارنا بيىل وقۋ- تانىمدىق، شىتىرمان وقيعالى، ويىن- ساۋىقتىق جانردا 27 انيماتسيالىق جوبا ۇسىنادى. ونىڭ ىشىندە ەل تاۋەلسىزدىگىنىڭ 30 جىلدىعىنا ارنالعان «مەنىڭ ەلىم»، «بابالار ءىزى»، «باۋىرجان»، «الپامىس»، «قازاقستان - قىزعالداقتار مەكەنى»، «تاۋەلسىزدىكتىڭ التىن كىلتى» جانە «عارىشكەر بالا جىگەر» سىندى انيماتسيالىق تۋىندىلار بار.
