13:01, 29 - ناۋرىز 2021 | GMT +5
اقتاۋدا قىزدار كافەنىڭ ەسىگىن بالعامەن ۇرىپ سىندىرعان - ۆيدەو
اقتاۋ. قازاقپارات - اقتاۋدا ءبىر توپ قىز 7-شاعىناۋداندا ورنالاسقان «ارابەللا» كافەسى ەسىگىنىڭ شىنى بولىگىن بالعامەن سىندىرعان، دەپ حابارلايدى قازاقپارات ءتىلشىسى.
وقيعا بەينەباقىلاۋ كامەراسىنا ءتۇسىپ قالعان. وقيعا بۇگىن تاڭەرتەڭ بولعان. كامەراعا جاسوسپىرىمدەردىڭ ەسىكتىڭ شىنى بولىگىن بالعامەن قالاي ۇرعانى ءتۇسىپ قالعان. كافە يەسىنىڭ ايتۋىنشا، قىزدار ەشتەڭە ۇرلاماعان. ءتارتىپ بۇزعان قىزدار وقيعا ورنىنان قاشىپ ۇلگەرگەن. دەگەنمەن كاسىپ يەسى بولعان وقيعانى ايتىپ، پوليتسياعا شاعىمدانباعان. كاسىپكەر اتالعان بويجەتكەندەر ءوز كىناسىن ءتۇسىنىپ، كەلگەن شىعىندى وزدەرى وتەپ بەرەدى دەگەن ۇمىتتە.
«ءبىز بۇل ماسەلەمەن پوليتسياعا ءالى جۇگىنگەن جوقپىز. مەن قىزداردىڭ ءومىرىن بۇزعىم كەلمەيدى. ءبىر تۇسىنىسپەۋشىلىك بولعان بولار. ولاردىڭ اتا-اناسى تاسپانى كورسە، وزدەرى كىناسىن مويىنداپ، كەلگەن شىعىندى وتەپ بەرەدى دەگەن ۇمىتتەمىن»، - دەيدى ءدامحانا يەسى.
اۆتور: قاراكوز مارات
