كوروناۆيرۋس: ۇلى بريتانيا تامىز ايىنا دەيىن تۋريستەرگە شەكارانى اشپاۋى مۇمكىن
بريتانيالىقتار قايتادان شەتەلگە قاشان بارا الاتىندىعى تۋرالى بيلىك 12- ساۋىردە حابارلاۋعا ۋادە بەردى. قازىرگى ۋاقىتتا ۇلى بريتانيادان شىعۋعا بىرنەشە جاعدايدا عانا رۇقسات ەتىلەدى.
اتاپ ايتقاندا، جۇمىس، ءبىلىم الۋ، ۇيلەنۋ تويلارى مەن جەرلەۋ راسىمدەرى، سونداي-اق ەرەكشە جەكە جاعدايلار. ۇلى بريتانياعا كىرۋشىلەرگە كەلەتىن بولساق، ولار كەلگەننەن كەيىن 10 كۇن وقشاۋلانىپ، ءوز ەسەبىنەن قۇنى 210 فۋنت ستەرلينگ بولاتىن ەكى تەست تاپسىرۋلارى ءتيىس. سونداي- اق كەلۋشىلەر ەلدەگى شەكتەۋلەر رەجيمىن ۇستانۋلارى كەرەك.
«قىزىل تىزىمدەگى» ەلدەردەن قازىر ەلگە تەك بريتانيالىق نەمەسە يرلانديالىق ءتولقۇجات يەلەرى، سونداي-اق ەلدە تۇراقتى تۇرۋعا قۇقىعى بار ادامدار كىرە الادى. كارانتين شارالارىن جەڭىلدەتۋ جەكسەنبى كۇنگى مالىمەتتەرگە سايكەس، 30 ميلليوننان استام بريتانيالىقتار ۆاكتسينانىڭ العاشقى دوزاسىن الدى. دۇيسەنبىدە ەلدە كەيبىر شەكتەۋلەر الىندى.
مىسالى، «ۇيدەن شىقپاۋ» ەرەجەسى جويىلدى، كەيبىر سپورتتىق ءىس-شارالارعا رۇقسات ەتىلدى، التى ادامعا دەيىن ۇيدەن تىس جەردە كەزدەسە الادى. بۇل - لوكداۋندى تولىعىمەن الىپ تاستاۋدىڭ العاشقى قادامى. الەۋمەتتىك الىستاۋ ەرەجەلەرى ءالى دە كۇشىندە. ۇلى بريتانيادا سىرقاتتانۋ دەڭگەيى قاڭتار ايىندا كۇنىنە 60 مىڭ جاعدايدان ناۋرىزدىڭ اياعىندا كۇنىنە 5 مىڭ جاعدايعا دەيىن تومەندەدى.
Sky News تەلەارناسىندا سويلەگەن سوزىندە مادەنيەت ءمينيسترى وليۆەر دوۋدەن ۇكىمەت قازىر بريتان حالقىنا حالىقارالىق ساپارلاردى قالاي جانداندىرۋعا بولاتىنى جايلى ويلانۋ ۇستىندە ەكەنىن ايتتى.
