الماتىدا ساۋدا ورتالىقتارى مەن بازارلاردا ەكپە جاسالماق

نۇر- سۇلتان. قازاقپارات - الماتىدا كوروناۆيرۋسقا قارسى ەكپە ەگۋ جۇمىستارىن جەدەلدەتۋ ءۇشىن بازار مەن ساۋدا ورتالىقتارىن دا قامتۋ كوزدەلگەن. ادام كوپ جۇرەتىن ورىنداردا ارنايى كابينەتتەر جاساقتالادى.

الماتىلىق سانيتارلار جاڭا جوبانى قولعا الدى. تۇرعىندار اراسىندا كوروناۆيرۋسقا قارسى ەكپە العاندار سانىن كوبەيتۋ ءۇشىن قوسىمشا كابينەتتەر اشىلماق.

«ولار قالاداعى ادام كوپ شوعىرلاناتىن ساۋدا ورتالىقتارى مەن بازارلاردا بولادى»، - دەيدى ماماندار. ءبىراق باستامانىڭ قاشان جۇزەگە اسىرىلاتىنى ازىرگە بەلگىسىز.

سادۋاقاس بايعابىلوۆ، قالالىق سانيتارلىق- ەپيدەميولوگيالىق باقىلاۋ دەپارتامەنتى باسشىسىنىڭ ورىنباسارى:

- بۇل ماسەلە قازىر زەرتتەلىپ جاتىر. ساۋدا ورىندارى مەن بازارلاردىڭ ينجەنەرلىك جەلىلەرى تەكسەرىلەدى. ودان كەيىن ءۇش بولمەدەن تۇراتىن ەكپە كابينەتتەرى جاساقتالادى. ياعني، ادامدى ەكپە الدىندا تەكسەرۋ، ەكپە جاساۋ، ەكپەدەن كەيىنگى باقىلاۋ كابينەتى بولۋى كەرەك. وعان قوسا، ۆاكسينانى ساقتايتىن مۇزداتقىشتار دا قاراستىرىلادى.

ۆاكسينانى ەمحانادا عانا قابىلداپ ۇيرەنگەن تۇرعىنداردىڭ كوبى بۇعان قارسى. ويتكەنى اسا جۇقپالى اۋرۋدىڭ الدىن الاتىن ەكپە سانيتارلىق تازالىعى تالاپقا ساي جەردە جاسالعانى ءجون.

«ءارى ەكپەدەن كەيىن دارىگەردىڭ باقىلاۋى دا ماڭىزدى»، - دەيدى تۇرعىندار.

- پوليكلينيكادا سالىنۋى كەرەك نەگىزى. سەبەبى، تازا ورىنداردا سالىنۋى ءتيىس ۋكولدىڭ بارلىعى. بليتس

- مەن دە مەديتسينا سالاسىندا جۇمىس ىستەيمىن. سوندىقتان دا ايتارىم، ۆاكسينانى قوعامدىق ورىنداردا سالعان دۇرىس ەمەس. ويتكەنى ۆاكسينا الاتىن ادام الدىن الا تەكسەرىلىپ، ۆاكسينادان كەيىن دە دارىگەردىڭ باقىلاۋىندا بولۋى كەرەك.

- سانيتارلىق تازالىق بولسا، وندا سالا بەرۋگە بولادى. رەسەيدە سالادى عوي ساۋدا ورتالىعىندا، پوليكلينيكادا دا سول سياقتى عوي.

قالانىڭ سانيتار ماماندارى بولسا، بازار مەن ساۋدا ورتالىقتارىنداعى ەكپە كابينەتتەرى بارلىق تالاپقا ساي جاساقتالادى دەپ وتىر. بۇگىنگە دەيىن ەكپە جۇمىستارىنىڭ العاشقى ءۇش كەزەڭىندە 15695 ادامعا ۆاكسينا ەگىلگەن.

www.24.kz