قۋانىش جاپاقوۆ: مەملەكەتتىك ورگاننىڭ بۇرىنعىداي قوعام مەن ب ا ق- تان جابىق بولۋى كەلمەسكە كەتتى

نۇر- سۇلتان. قازاقپارات - سىبايلاس جەمقورلىققا قارسى كۇرەس اگەنتتىنىڭ اپپارات باسشىسى قۋانىش جاپاقوۆ مەملەكەتتىك ورگان باسشىلارىن قوعامعا ارقا سۇيەپ جۇمىس ىستەۋگە شاقىردى، دەپ حابارلايدى قازاقپارات ءتىلشىسى.

اگەنتتىك وكىلىنىڭ ايتۋىنشا، مەملەكەتتىك ورگانداردىڭ جانىنان اشىلعان Adaldyq alany جوبالىق كەڭسەلەرى مەملەكەتتىك قىزمەتتىڭ ساپاسىن جاڭا دەڭگەيگە كوتەرگەن.

«بۇگىندە ءاربىر وبلىستىق اكىمدىك جانىنان جانە مينيسترلىكتەر جانىنان Adaldyq alany جوبالىق كەڭسەلەرى اشىلعان. ەكى جىلدىڭ ىشىندە بۇل كەڭسەلەر جەمقورلىققا قارسى اۋقىمدى قوزعالىس دەڭگەيىنە جەتىپ وتىر. ءتىپتى تۇرمىستىق دەڭگەيدەگى سىبايلاس جەمقورلىققا قارسى كۇرەستىڭ جالپىۇلتتىق برەندىنە اينالدى دەۋگە بولادى. وسى يدياەيانىڭ اياسىندا مەملەكەتتىك ورگاندار اۋقىمدى ءتۇردى ترانسفورماتسياعا ءتۇستى. قازىر مەمورگانداردا قىزمەت كورسەتۋدىڭ سەرۆيستىك مودەلى جۇمىس ىستەپ تۇر. ناتيجەسىندە ءتۇرلى دەڭگەيدەگى 300-دەن استام سەرۆيستىك اكىمدىك، 2000-نان استام كەدەرگىسىز فرونت كەڭسە اشىلدى»، - دەدى قۋانىش جاپاقوۆ.

ول، سونداي- اق، بۇدان بىلاي مەملەكەتتىك ورگانداردىڭ تابىستى جۇمىس ىستەۋى قوعامنىڭ قانشالىقتى قولدايتىنىنا بايلانىستى بولادى دەگەن وي ايتتى.

«مەملەكەتتىك ورگانداردىڭ باسشىلارى مىنا ءبىر اقيقاتتى ءتۇسىنۋى كەرەك. قوعامنىڭ قولداۋىنسىز تابىسقا جەتۋ مۇمكىن ەمەس. الەم ەندى وزگەرمەيدى. بۇگىن ءبارىمىز اشىق جاعدايدا قالىپ وتىرمىز. بۇرىنعىداي قوعامنان، ب ا ق- تان جابىق بولۋ مۇمكىن ەمەس. ءبىزدىڭ اگەنتتىك قۇقىق قورعاۋ ورگانى رەتىندە الدەقايدا كونسەرۆاتيۆتى بولۋىمىز كەرەك ەدى. ءبىراق ءبىز كەرىسىنشە تولىق بايلانىسقا ەسىك اشىپ وتىرمىز. وسى ارقىلى ءوز ۇلگىمىزدە باسقاشا جۇمىس ىستەۋگە بولمايتىنىن كورسەتكىمىز كەلەدى»، - دەدى اگەنتتىك وكىلى ەلوردادا وتكەن سەمينار كەڭەستە.

ەسكە سالساق، بۇگىن ەل استاناسىندا سىبايلاس جەمقورلىقپەن كۇرەسكە ۇكىمەتتىك ەمەس ۇيىمدار مەن ساراپشىلىق توپتاردى تارتۋ ماسەلەسىن تالقىلاعان جيىن وتكەن.

فوتو: www.ng.kz

اۆتور: ەسىمجان ناقتىباي