ستۋدەنتتەر مەن دوكتورانتتاردىڭ شاكىرتاقىسى قانشالىقتى وسەدى
بۇل جايىندا ءماجىلىس دەپۋتاتتارىنىڭ ساۋالىنا ق ر پرەمەر-ءمينيسترى اسقار ءماميننىڭ جاۋابىندا ايتىلعان، دەپ حابارلايدى قازاقپارات ءتىلشىسى.
«ءبىلىم الۋشىلاردىڭ وقۋعا دەگەن قىزىعۋشىلىعىن ارتتىرۋ ماقساتىندا مەملەكەت ءبىلىم بەرۋ گرانتتارىن ۇسىنۋ، جولاقىسىن وتەۋ جانە وقۋداعى جەتىستىكتەرىن ەسكەرە وتىرىپ شاكىرتاقى تولەۋ تۇرىندە ءتيىستى جاعداي جاسايدى. شاكىرتاقى مولشەرىن ۇلعايتۋ ماسەلەسى ۇنەمى باقىلاۋدا تۇر جانە بيۋدجەت مۇمكىندىكتەرىنە بايلانىستى قاراستىرىلادى. ماسەلەن، باكالاۆريات ستۋدەنتتەرىنىڭ اي سايىنعى مەملەكەتتىك شاكىرتاقىسىنىڭ مولشەرى 2005 -جىلعى 2913 تەڭگەدەن 2020 -جىلى 26186 تەڭگەگە دەيىن كەزەڭ- كەزەڭىمەن ۇلعايتىلدى»، - دەدى اسقار مامين.
ۇكىمەت باسشىسىنىڭ اتاپ وتۋىنشە، 2020 -جىلعى 27-مامىردا وتكەن ۇلتتىق قوعامدىق سەنىم كەڭەسىنىڭ ءۇشىنشى وتىرىسىندا مەملەكەت باسشىسى بەرگەن تاپسىرماعا سايكەس، 2020 -جىلدىڭ 1-قىركۇيەگىنەن باستاپ پەداگوگيكا ماماندىعى بويىنشا باكالاۆريات باعدارلاماسىندا ءبىلىم الىپ جاتقان ستۋدەنتتەردىڭ شاكىرتاقىسى 26 مىڭنان 42 مىڭعا دەيىن، ال دوكتورانتتاردىڭ شاكىرتاقىسى 150 مىڭ تەڭگەگە دەيىن كوتەرىلدى.
«جاستار- وتانعا!» باعدارلاماسىن جۇزەگە اسىرۋ جول كارتاسىنىڭ 12، 13 تارماقتارىنا سايكەس، 2025 -جىلعا دەيىن ستۋدەنتتەردىڭ شاكىرتاقىسىن 100 پايىز، ال ماگيسترانتتار مەن دوكتورانتتاردىڭ شاكىرتاقىسى 75 پايىزعا كەزەڭ-كەزەڭىمەن ۇلعايتۋ كوزدەلگەنىن اتاپ وتكەن ءجون»، - دەدى پرەمەر-مينيستر.
اۆتور: مارلان جيەمباي