ەلوردادا قاي جاستاعى تۇرعىندار ك ۆ ي جۇقتىرۋعا بەيىم - دارىگەر جاۋابى

نۇر-سۇلتان. قازاقپارات - نۇر-سۇلتان قالاسىنىڭ باس مەملەكەتتىك سانيتار دارىگەرى سارحات بەيسەنوۆا ەلورداداعى ك ۆ ي جۇقتىرعانداردىڭ جاس قۇرىلىمىن ايتىپ بەردى، دەپ حابارلايدى قازاقپارات ءتىلشىسى.

«جاس قۇرىلىمى بويىنشا 40-49 جاستاعى ەرەسەكتەر - 23,9 پايىز، 50 جاس جانە ودان جوعارى - 23,4 پايىز، سونداي-اق 14 جاسقا دەيىنگى بالالار اراسىندا - 20,3 پايىز وسى ينفەكسياعا كوبىرەك بەيىم. ديناميكادا 14 جاسقا دەيىنگى بالالار اراسىندا جۇقتىرۋ جاعدايلارىنىڭ 5پايىز- عا ءوسۋى بايقالادى (قاڭتار - 15,1 پايىز، اقپان - 16,8 پايىز، ناۋرىز - 20,3 پايىز). بۇل رەتتە ناۋرىز ايىندا 2-6 جاستاعى بالالار اراسىندا اۋىرعانداردىڭ سانى 1,5 ەسە ءوستى»، - دەپ ءتۇسىندىردى س. بەيسەنوۆا ەلوردا اكىمدىگىندە وتكەن ونلاين بريفينگتە.

سونىمەن بىرگە، سپيكەردىڭ ايتۋىنشا، نەگىزىنەن ەڭ كوپ اۋرۋعا شالدىعۋشىلار قاتارى جۇمىسكەرلەر - 43 پايىز، جۇمىسسىزدار - 22,3 پايىز، زەينەتكەرلەر - 11,7 پايىز. زەينەتكەرلەر اراسىندا اۋىرعانداردىڭ 2 پايىزعا، وقۋشىلار اراسىندا - 3,4 پايىزعا (قاڭتار - 9,6 پايىز، اقپان - 11,6 پايىز، ناۋرىز - 13 پايىز) وسكەنى بايقالادى. بۇعان دەيىن سارحات بەيسەنوۆا ەلورداداعى ك ۆ ي جۇقتىرۋ ستاتيستيكاسىن جاريالاعان ەدى. ەلوردادا كوروناۆيرۋس جۇقتىرعاندار كۇنىنە 150 دەن 280 گە دەيىن تىركەلەدى. سونىمەن بىرگە، س. بەيسەنوۆا قانداي جاعدايدا كارانتين تالاپتارى كۇشەيتىلەتىنىن ءتۇسىندىردى.

اۆتور: ايجان سەرىكجان قىزى